Aðstandendur ungrar fjögurra barna móðir óttast mjög um hana eftir að hún hvarf sporlaust mánuði eftir að hafa eignast tvíbura. Konunni sem um ræðir, Savannah Spurlock frá Kentucky í Bandaríkjunum, hefur nú verið saknað í rúman mánuð.
Lögregla hefur rannsakað málið undanfarnar vikur og meðal annars farið yfir upptökur úr öryggismyndavélum. Hún sást síðast í mynd yfirgefa bar í Lexington ásamt þremur mönnum seint um nótt þann 4. janúar síðastliðinn. Lögregla ræddi við þessa menn og þeir sögðust hafa farið með hana á heimili eins þeirra um 60 kílómetra í burtu.
Að því er Fox News greinir frá sögðu mennirnir að Spurlock hefði yfirgefið heimilið daginn eftir af sjálfsdáðum. Síðan þá hafi þeir hvorki séð hana né heyrt frá henni. Lögregla hefur ekki getað staðfest þessa frásögn mannanna og liggja þeir undir grun um aðild að hvarfinu.
Bifreið Spurlock, sem eignaðist tvíbura í desember og á fyrir fjögurra og tveggja ára drengi, fannst í Lexington en inni í henni var veskið hennar og jakki. Móðir hennar segir að frásögn mannanna standist ekki. „Ég held að þeir viti meira en þeir segja. Sagan þeirra gengur ekki upp. Hún fór með þeim án peninga, bíllaus, jakkalaus og símalaus.“
Enginn hefur verið kærður fyrir aðild að hvarfinu en leit hefur staðið yfir á opnum svæðum í nágrenninu.