„Óttinn við innflytjendur er keyrður áfram á órökstuddum ótta“. Þetta sagði Frans Páfi er hann hitti blaðamenn í dag á leið sinni til Panama. Sagði hann einnig við blaðamenn að óttinn gæti gert fólk geðveikt. Páfinn mun eyða 6 dögum í Panama og meðal annars hitta leiðtoga kaþólsku kirkjuna þar í landi ásamt Juan Carlos Varela Rodríguez, forseta landsins. Innflytjendamál verða fyrirferðarmikil á dagskrá Páfans í heimsókn hans í Panama og mun hann hitta leiðtoga ýmissa samtaka sem aðstoða innflytjendur. Áður en Frans Páfi lagði af stað frá Róm í dag hitti hann átta flóttamenn og ræddu þeir saman um hvernig það er að vera flóttamaður og þá fordóma sem þeir verða fyrir á götum Rómar.
Páfinn mun ferðast víðs vegar um heiminn þetta árið og eru meðal annars skipulagðar heimsóknir til Sameinuðu Arabísku furstadæmanna, Marokkó, Búlgaríu, Makedóníu, Rúmeníu og Japan. Embættismenn í Vatíkaninu sögðu að Frans Páfi hafi einnig óskað eftir því að fara til Íraks og Norður-Kóreu, en þær heimsóknir munu þurfa mikinn undirbúning og ekki víst að það náist að undirbúa þær heimsóknir þetta árið.