Minnst átján eru látnir eftir að ungur piltur sprengdi heimatilbúna sprengju og hóf skotárás í skóla í borginni Kerch á Krímskaga í dag. Skólinn sem um ræðir er tækniskóli á menntaskólastigi og eru tugir sagðir særðir eftir árásina.
Að því er breska blaðið Guardian greinir frá var einn maður, 18 ára nemandi skólans, að verki. Hann er sagður hafa gengið inn vopnaður hríðskotabyssu. Skaut hann á nemendur og kennara áður en hann sprengdi heimatilbúna sprengju í matsal skólans.
Árásarmaðurinn er sagður hafa svipt sig lífi eftir voðaverkið. Lögregla hefur ekki staðfest hvort fleiri en einn hafi verið að verki en flest þykir benda til þess á þessu stigi málsins.
Kerch er borg austast á Krímskaga sem hefur verið miðpunktur átaka Rússa og Úkraínumanna á undanförnum árum. Yfirvöld í Rússlandi innlimuðu skagann árið 2014.
