Hinir geysivinsælu sjónvarpsþættir Game of Thrones hafa heldur betur komið króatíska bænum Dubrovnik á landakortið og er bærinn orðinn vinsæll áfangastaður ferðamanna. En heimamenn eru orðnir þreyttir á áganginum og lái þeim hver sem vill. Frá áramótum hafa um 800.000 ferðamenn lagt leið sína til bæjarins en þar búa um 40.000 manns. Reiknað er með að fjöldinn verði kominn í eina milljón fyrir áramót.

Dubrovnik er á heimsminjaskrá UNESCO og er ægifagur bær. Þegar horft er á Game of Thrones fer stór hluti sögunnar fram í bænum Kings Landing en þau atriði voru tekin upp í Dubrovnik. Miðað við áhorfið og vinsældir þáttanna er ekki að furða að bærinn „njóti góðs“ af áhuganum. Þátttaka Króatíu í lokakeppni HM í sumar á einnig sinn þátt í að lokka ferðamenn til bæjarins.

En það er ekki bara dans á rósum að fá svona marga ferðamenn. Þegar verst, eða best, lætur eru um 16.000 ferðamenn í bænum á degi hverjum. Flestir koma með skemmtiferðaskipum. Marc van Bloemen, íbúi í bænum, er ekki alveg sáttur við þetta.

„Það er ekki hægt að skilja þetta. Þetta er eins og að búa í miðju Disneylandi. Það er ringulreið, algjör ringulreið.“