Þegar Hjalte, tveggja ára, gekkst undir aðgerð á hálsi, þar sem separ voru fjarlægðir, gleymdi læknirinn grisju í hálsi hans. Hjalte grét næstu daga og vildi hvorki borða né drekka. Fjórum dögum eftir aðgerðina byrjaði hann að eiga í vandræðum með andardrátt. Þegar foreldrar hans lömdu á bak hans hóstaði hann upp grisju, fimm sinnum tveir sentimetrar að stærð.

Hjalte fór í aðgerðina hjá lækni í Brønderslev á Jótlandi í Danmörku. Foreldrar hans, Jannie og Michael Dam Boldt, tilkynntu málið til Styrelsen for Patientsikkerhed (stofnun sem hefur eftirlit með öryggismálum sjúklinga í Danmörku). Nordjyske.dk segir að læknirinn hafi þegar verið undir sérstöku eftirliti hjá stofnunnin vegna annars máls. Þá var læknirinn að gera aðgerð á litlum dreng sem fékk hjartastopp í miðri aðgerð. Það tókst að endurlífga hann en hann hlaut varanlegan heilaskaða af.

Læknirinn vísar staðhæfingum foreldra Hjalte á bug en vill ekki fara nánar ofan í málið og vísar í þagnarskyldu sem hann sé bundinn.