Frá 2014 hafa alvarlegar kvartanir komið fram um starfsemi 13 flóttamannamiðstöðva í Texas. Tveimur hefur verið lokað í kjölfar kvartananna. Í þessum flóttamannamiðstöðvum eru börn meðal annars vistuð. Þetta kemur fram í nýrri rannsókn sem dagblaðið Texas Tribune gerði í samvinnu við fleiri.

Fram kemur að líkamlegt og kynferðislegt ofbeldi hafi viðgengist í flóttamannamiðstöðvunum og að reglur um öryggi og vellíðan barna hafi verið brotnar. Þessar flóttamannamiðstöðvar eru reknar af einkaaðilum og þar dvelja börn oft í mjög langan tíma. Börnin koma annað hvort ein síns liðs til Bandaríkjanna eða með foreldrum sínum.

Ásakanirnar um misnotkun og vanrækslu teygja sig um 20 ár aftur í tímann og ná fram til dagsins í dag. Eitt þeirra fyrirtækja sem reka þessar flóttamannamiðstöðvar er Southwest Key Programs en 246 kvartanir hafa borist vegna starfsemi þess. Fyrirtækið hefur verið í kastljósi fjölmiðla eftir að fram kom í síðustu viku að allt að 1.500 börn hafi verið lokuð inni í stórum búrum í gömlum stórmarkaði sem Southwest Key Programs hefur breytt í flóttamannamiðstöð. Þeirri flóttamannamiðstöð hefur þó ekki verið lokað.

Rúmlega 100 kvartanir höfðu borist vegna annarrar þeirra flóttamannamiðstöðvar sem hefur nú verið lokað. Þar á meðal var kvartað yfir „óviðeigandi kynferðislegum samskiptum starfsmanna og barna, þungum refsingum og ónægri læknisaðstoð“.