Lucasz Herba, sem er þrítugur Pólverji, var nýlega dæmdur í 16 ára og 9 mánaða fangelsi fyrir að hafa rænt bresku fyrirsætunni Chloe Ayling og haldið henni fanginni í sex daga. Það var dómstóll í Mílanó á Ítalíu sem kvað dóminn upp en þangað lokkaði Herba fyrirsætuna undir því yfirskini að hún fengi fyrirsætustarf þar.

En þess í stað var henni rænt og henni haldið fanginni á sveitabýli á Ítalíu í sex daga. Herba sagði að hún hafi farið með honum af fúsum og frjálsum vilja en því hefur Ayling neitað. BBC skýrir frá þessu.

Fyrir rétti skýrði lögreglan frá því að Ayling hefði verið gefið deyfilyf og síðan hafi hún verið sett í ferðatösku og flutt í henni til sveitabýlisins. Ayling sagði fyrir dómi að hún hefði sætt andlegum og líkamlegum misþyrmingum á meðan hún var á valdi Herba.

Herba krafðist 300.000 evra í lausnargjald fyrir hana og auglýsti hana til sölu á netinu.