Hér er á ferðinni kaldur hafragrautur fyrir kaffiunnendur úr smiðju Berglindar Hreiðars köku- og matarbloggara með meiru sem heldur úti síðunni Gotterí og gersemar.

„Ég er ekki mikið fyrir heitan hafragraut þó ég þræli honum alveg í mig annað slagið en það er allt aðra sögu að segja af köldum slíkum. Ég elska nefnilega kalda hafragrauta með góðum toppi. Þessi hérna er algjör negla og kaffikeimurinn í honum skemmtileg tilbreyting,“ segir Berglind alsæl með sinn drykk.

Kaffigrautur

1 glas/krús

Kaldur hafragrautur

40 g tröllahafrar

2 tsk. chiafræ

100 ml mjólk að eigin vali

20 ml kaffi (styrkleiki eftir smekk)

2 msk. hrein jógúrt

1 tsk. hunang

Hrærið öllu saman í glasi/krús, plastið og geymið í ísskáp í að minnsta kosti 4 klukkustundir. Hrærið upp í grautnum og setjið lúxus topp ofan á (sjá að neðan).

Toppur

Um ¼ banani (í bitum)

1 tsk. gróft hnetusmjör (þykkt)

Ristaðar kókosflögur

1 tsk. saxað suðusúkkulaði

Smá kakóduft

Þunnt hnetusmjör yfir allt í lokin (gott að nota í flösku sem hægt er að sprauta úr).

Svo er bara að njóta!