Um helgina er framundan fyrsti í aðventu og þá hefst niðurtalningin í jólin, aðfangadag.  Margir njóta þess að eiga góðar samverustundir í aðventunni og eitt af því sem gaman er að gera saman er að baka og skreyta kökur. Við á matarvef DV.is ætlum að vera duglega að birta jólalegar uppskriftir í aðventunni og gefa ykkur hugmyndir hvað er hægt að gera til að njóta með fjölskyldum og vinum.

Hér er ein ofur einföld og jólaleg uppskrift sem gaman er að útbúa á aðventunni sem kemur úr smiðju Berglindar Hreiðars köku- og matarbloggara með meiru sem heldur úti síðunni Gotterí og gersemar. Þessi uppskrift er fullkomin til að njóta í aðventunni.

Þessar bollakökur eru djúsí og mjúkar með vanillu smjörkremi sem búið er að sprauta í jólatré. Að sjálfsögðu má sprauta annað munstur á þær en það svo nú er um að gera að leyfa hugmyndafluginu að njóta sín og hver og einn fái leika sér með sköpunarhæfileikana.

Bollakökujólatré

22-24 stykki

Súkkulaðibollakökur

1 x Betty Crocker Devils Food Cake mix

4 egg

130 ml Isio 4 matarolía

250 ml vatn

3 msk. bökunarkakó

1 pk. Royal súkkulaðibúðingur (duftið)

Hitið ofninn í 160°C og setjið pappaform í álform fyrir bollakökur. Hrærið saman eggjum, olíu og vatni. Bætið bökunarkakó og Betty dufti saman við, hrærið vel í um 2 mínútur og skafið niður á milli. Bætið búðingsduftinu saman við í lokin og hrærið létt. Skiptið niður í formin og bakið í 18-20 mínútur. Setjið á kæligrind og leyfið kökunum að kólna alveg áður en þið útbúið kremið.

Smjörkrem og skreyting

280 g smjör við stofuhita

500 g flórsykur

¼ tsk. salt

3 tsk. vanilludropar

100 ml rjómi

Grænn matarlitur

Kökuskraut/sykurstjörnur

Flórsykur (til að sigta yfir)

Þeytið smjörið eitt og sér þar til það verður létt í sér. Bætið flórsykri og rjóma saman við í nokkrum skömmtum á víxl og hrærið vel á milli. Bætið vanilludropum og salti saman við og hrærið vel. Setjið matarlit saman við, hrærið og skafið niður nokkrum sinnum þar til þið náið þeim litatón sem óskað er. Setjið kremið í sprautupoka og sprautið jólatré. Ég notaði stút 6B frá Wilton og hafði neðstu stjörnuna breiðasta og síðan hinar alltaf aðeins minni og minni til að mynda jólatré. Setjið sykurstjörnu á toppinn og sigtið flórsykur yfir hvert tré sem snjó.

Gleðilega aðventu.