Hér er á ferðinni ótrúlega gott ískaffi með súkkulaðibragði úr smiðju Berglindar Hreiðars köku,- og matarbloggara sem heldur úti síðunni Gotterí og gersemar. Það er gaman að prófa sig áfram með kalda kaffidrykki nú þegar sumarið nálgast. Þessi hér er mjög einfaldur og góður um leið og hann er fallegur og fágaður. Þessi á eftir að heilla gestina upp úr skónum.

Súkkulaði ískaffi

Fyrir 2 glös

150 ml G-mjólk

150 ml Hleðsla með súkkulaðibragði

Klakar

Kaffifroða (sjá uppskrift hér að neðan)

Bökunarkakó

Hrærið saman G-mjólk og Hleðslu. Hálffyllið glas með klökum og skiptið blöndunni niður í glösin.Toppið með kaffifroðu og stráið smá bökunarkakó yfir. Hrærið síðan öllu saman og njótið.

Kaffifroða

2 msk. skyndikaffi (Nescafé)

2 msk. sykur

2 msk. sjóðandi vatn

Þeytið allt saman þar til létt og ljós kaffifroða hefur myndast. Áferðin á að minna á þeyttan rjóma.