Vítalía Lazareva er í fanta formi en hún borðar mest úr jurtaríkinu og dugleg að deila uppskriftum með fylgjendum sínum á samfélagsmiðlum.

Hún er að læra matvælafræði við Háskóla Íslands og nýtur sín í eldhúsinu þar sem hún galdrar fram hvern réttinn á fætur öðrum.  Mataræðið hennar er það sem kallast plant based sem þýðir að hún sniðgengur dýraafurðir að mestu.

Vítalía deilir eftirfarandi uppskrift með lesendum DV  – gómsætum vegan súkkulaðibitakökum sem eru bæði mjúkar og djúsí.

Innihaldsefni:

• ½ bolli vegan smjör (Ég notast við Earth Balance smjörið)
• 275 gr púðursykur
• 188 gr hveiti
• 2 tsk vanilludropar
• 2 tsk kartöflumjöl
• 1 tsk matarsódi
• ½ tsk salt
• 250 gr saxað suðusúkkulaði
• 3 matskeiðar vatn
• 1 matskeið hörfræ

Leiðbeiningar:

–       Byrjið á því að hita ofninn á 175 gráður

–       Blandið saman hörfræjunum og vatninu og leggið til hliðar, blandan þykknar

–       Blandið saman í skál, smjörinu og púðursykrinum og þeytið í ca 3 mínútur, þar til samfellt.

–       Næst skal bæta við vegan egginu sem var búið til úr vatninu og hörfræjunum og hræra með sleif, bætið við vanilludropunum.

–       Þegar búið er að hræra vegan egginu saman við má bæta við hveitinu, kartöflumjölinu,saltinu og matarsódanum og þeyta þangað til deigið er orðið samfellt.

–       Síðast skal bæta við suðusúkkulaðinu sem hefur verið saxað niður í degið.

–       Rúllið deiginu í kúlur og leggið á bökunarpappír.

–       Bakist í 11 mínútur