Una Guðmunds kemur hér með klassískar uppskriftir sem njóta alltaf mikilla vinsælda. Landsmenn hreinlega elska mexíkóskan mat og eru uppskriftir að honum alltaf með þeim vinsælustu á vefmiðlum hérlendis og tróna hinar ýmsu útgáfur af þessari súpu þar efst.

Mexíkó-kjúklingasúpa

3 stk. kjúklingabringur
1 tsk. salt
½ laukur, skorinn smátt
1 stk. rauð paprika, smátt söxuð
2 msk. ólífuolía
1,5 l vatn
1 stk. kjúklingateningur
1 tsk. kumin
1 tsk. cayennepipar
5 msk. chilisósa
1 dós saxaðir tómatar
4 msk. tómatþykkni

Meðlæti.
Nachos-snakk
Sýrður rjómi
Rifinn ostur

Byrjið á að skera niður kjúklingabringurnar í bita, steikið á pönnu og gegnsteikið.
Skerið papriku og lauk niður smátt og blandið saman við kjúklinginn á pönnunni.
Hitið upp vatn í potti og leysið upp kjúklingateninginn.
Bætið söxuðu tómötunum ásamt öllu hinu hráefninu saman í pottinn og látið sjóða og lækkið svo og látið malla við vægan hita, kjúklingurinn verður extra góður ef hann fær að malla í góðan tíma.

Berið fram með snakki, sýrðum rjóma og rifnum osti.