fbpx
Miðvikudagur 23.september 2020
Matur

Lítið skref fyrir Jóa, en stórt skref fyrir mig – Óttaðist að missa kökuna fyrir framan hlæjandi manna mergð

Jón Þór Stefánsson
Sunnudaginn 9. ágúst 2020 20:20

Jói Fel á góðri stundu með blaðamanni DV við kökuskreytingar. MYND/ERNIR

Ekki missa af Helstu tíðindum dagsins í pósthólfið þitt

Lesa nánar

Lífið á DV er gott þessa dagana. Í síðustu viku fór ég í súkkulaðinudd, sem var ansi mikill lúxus. Í byrjun þessarar viku spurði yfirmaður minn aftur hvað ég vildi gera í þessari viku. Það var tilvalið að halda áfram með súkkulaðiþemað og því lét ég dálæti mitt á kökum í ljós. Áður en ég vissi af var búið að hringja í bakarann þjóðþekkta Jóa Fel og fundur okkar á milli ákveðinn.

Ég fór í bakaríið hans Jóa í Holtagörðum um hádegisleytið á miðvikudegi. Við ákváðum að við myndum skreyta köku saman. Vekjaraklukkan mín hefði þurft að hringja um miðja nótt hefði ég viljað baka með honum, enda eru bakarar líklega sú stétt sem er hvað þekktust fyrir að vakna snemma. Fyrirkomulagið hentaði mér vel, þar sem að ég á í erfiðleikum með að vakna klukkan átta eða níu á morgnana.

Jói er aðalmaðurinn í bakaríinu

Það þarf engan skipulagsverkfræðing til að átta sig á því að Jói er aðalmaðurinn í bakaríinu. Ég var ekki lengi að spotta hann, en áður en mér tókst að heilsa honum þurftu ábyggilega þrír eða fjórir að ná af honum tali, bæði starfsmenn og viðskiptavinir. Þegar mér tókst loksins að fanga athygli Jóa fylgdi hann mér á bak við afgreiðsluborðið, en þar er sjálft bakaríið. Fyrstu fyrirmælin voru bæði einföld og sniðug: „Þvo sér um hendur og spritta“. Þórólfur er ábyggilega ánægður með Jóa

Sjálfur hef ég aldrei komið í bakarí, það er að segja fyrir utan inn í afgreiðsluna. Það kom mér á óvart hversu stórt svona apparat er í raun og veru. Óteljandi ofnar, færibönd, borð, skápar, deig og kökur. Í þessu tiltekna bakaríi er bakað fyrir hin bakaríin hans Jóa Fel, sem eru orðin allmörg og því er nóg að gera og tíu bakarar að störfum.

Björt framtíð í kökuskreytingum

Jói sótti köku og krem sem hafði verið búið til í morgun. Hann rétti mér spaða og sleif og sagði mér að smyrja kökuna með kreminu, sem ég og gerði. Það fer ekki á milli mála að Jói vill hafa nóg af súkkulaði á kökunum og passaði upp á að hver krókur og kimi væri húðaður í súkkulaði.

Næst tók við annað og flóknara verkefni, að búa til marsípan-rós. Mig hafði aldrei grunað að ég gæti gert slíka. Jói sótti marsípan-rúllu og skar hana í bita, úr bitunum gerðum við litlar kúlur sem voru síðan pressaðar í smjörpappír, og þannig urðu til rósablöð. Eftir það rúllaði maður blöðunum saman og smátt og smátt varð til falleg rós. Ef þessi lýsing er ekki nægilega nákvæm þá er ábyggilega hægt að læra svona á YouTube. Ég og Jói gerðum sitthvora rósina. Ef til vill var sú sem Jói gerði aðeins fallegri en mín, þó var ég mjög ánægður með mína.

Seinasta skrefið leyfði listamanninum í mér að blómstra. Þá sótti Jói súkkulaðilauf, -bita, -prik og -strá, auk jarðarberja, bláberja og einhvers konar gulra berja sem heita víst blæjuber. Hann sagði mér að gera það sem ég vildi og það gerði ég. Eftir nokkurra mínútna skreytingar kom í ljós að ég á bjarta framtíð í kökuskreytingum. Samt vantaði eitthvað, Jói var ekki lengi að fatta hvað það var: Smá glimmer, sem hann stráði yfir kökuna. Útkoman var sannkallað meistaraverk, þó ég segi sjálfur frá.

Stórt skref fyrir mig

Jói sagði mér að hann hefur verið í bökunarbransanum í bráðum fjörutíu ár, eða síðan hann var sextán ára. Honum finnst ekkert skemmtilegra en að baka og það næstskemmtilegasta er að elda. Ef maður væri ekki að gera eitthvað skemmtilegt, þá væri það bara tilgangslaust. Þegar ég spurði Jóa hvað hann hefði gert margar kökur fór hann að hlæja, enda erfitt að telja, líklega væru þær í tugum þúsunda talsins. Þessi kökuskreyting var því lítið skref fyrir Jóa, en stórt skref fyrir mig.

Þegar ljósmyndarinn var búinn að taka myndirnar, kvöddumst við Jói, hann sagði mér að enginn myndi þora að skera kökuna.

Sá fyrir mér kökuslys

Leiðin til baka var vandasöm, kollegar mínir á DV höfðu sagt „eins gott að þú komir með kökuna til okkar eftir á“. Ég komst að því að hraðahindranir eru ekki bestu vinir svona köku-listaverka. Ég kom þó bílnum á áfangastað, en það í talsverðri fjarlægð frá vinnustaðnum mínum, þar sem gjaldfrjáls stæði eru ekki á hverju strái í miðbænum. Við tók löng og ströng ganga. Ég sá fyrir mér svakalegt kökuslys, að ég myndi missa kökuna fyrir framan manna mergð, sem myndi hlæja að mér.

Sem betur fer komst ég á leiðarenda, vinnufélögum mínum til mikillar ánægju. Enginn trúði því að ég hefði skreytt þessa köku, allra síst gert blómið, sem var líkt og áður kom fram, mjög flott. Spádómur Jóa rættist, enginn þorði að skera kökuna í fyrstu. Það var mál starfsmanna að þetta væri einstaklega ljúffeng kaka. Og alveg sérstaklega vel skreytt.

Það væru allir til í að fá sér eina svona tertu – MYND/ERNIR

Þessi grein birtist í tölublaði DV þann 31. júlí

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Í vikunni

Matur
Fyrir 3 vikum

Líklega fallegasti hamborgari landsins – kroppurinn elskar hann

Líklega fallegasti hamborgari landsins – kroppurinn elskar hann
Fyrir 3 vikum

Losaðu þig við sykurpúkann með þessu konfekti

Losaðu þig við sykurpúkann með þessu konfekti
Matur
23.08.2020

Eldhúshetjan Eva – Ritzkexhjúpaður camembert sem tryllir

Eldhúshetjan Eva – Ritzkexhjúpaður camembert sem tryllir
Matur
23.08.2020

Bragðmikil og fersk naan-pitsa að hætti Margrétar Bjarna

Bragðmikil og fersk naan-pitsa að hætti Margrétar Bjarna
Matur
16.08.2020

Sjúkleg eplabaka með súkkulaði og kókos

Sjúkleg eplabaka með súkkulaði og kókos
FréttirMatur
14.08.2020

Stóra beyglumálið – Myllan sendir frá sér yfirlýsingu

Stóra beyglumálið – Myllan sendir frá sér yfirlýsingu
Matur
03.08.2020

Sveinn Kjartansson býður upp á svart linguine með reyktum silungi og skjaldfléttusalati

Sveinn Kjartansson býður upp á svart linguine með reyktum silungi og skjaldfléttusalati
Matur
01.08.2020

Mexíkóveisla og marengsbomba frá Unu í eldhúsinu

Mexíkóveisla og marengsbomba frá Unu í eldhúsinu