Una Guðmundsdóttir, matgæðingur DV, smellir hér í sumarlega rétti sem lágmarka inniveruna og hámarka ánægjustundir við matarborðið – úti eða inni.
Sumarlegar ostakökur með lime
1 pakki LU-kex
500 g rjómaostur
500 g rjómi
1 pakki Royal-vanillubúðingur
1 tsk. vanilludropar
60 g flórsykur
2 stk. lime
Myljið LU-kex í matvinnsluvél og setjið í botninn á glösunum. Þeytið rjóma létt, ekki stífþeyta hann.
Blandið Royal-vanillubúðingi saman við 1 dl af mjólk og kælið í ísskáp í um 10 mínutur og blandið honum svo saman við rjómann.
Þeytið rjómaostinn, flórsykurinn og vanilludropana saman við rjómablönduna.
Kreistið safa úr einu lime saman við blönduna.
Leggið blönduna yfir kexmylsnuna, skreytið með lime og kælið í um klukkustund áður en borið er fram.
Verði ykkur að góðu.
Oreo-ostakökur
1 pakki Royal-vanillubúðingur
150 g flórsykur
500 g rjómi
500 g rjómaostur
1 tsk. vanilludropar
2 stk. Oreo-kexpakkar, ég notaði einnig míní Oreokex til að skreyta.
Byrjið á því að þeyta Royal-búðinginn saman við 1 dl af mjólk og kælið í ísskáp í um 10–15 mínútur.
Þeytið rjómann vel og blandið svo saman rjómaostinum og þeytið vel saman. Næst er flórsykrinum bætt saman við og vanilludropunum. Að lokum er vanillubúðingnum bætt saman við.
Oreo-kexkökurnar eru settar í matvinnsluvél eða blandarann og hakkaðar niður í fína mylsnu. Setjið Oreo-kexmylsnuna í botninn og þar á eftir rjómaostablönduna. Skreytið svo að vild.
Best er að geyma ostakökurnar í kæli í um klukkustund áður en þær eru bornar fram.