„Pitsusnúðar eru alltaf góðir og gott að eiga þá til í frysti og grípa með í nesti á morgnana, nú eða í útileguna. Skemmtilegt er að leyfa börnunum að hjálpa til og velja sitt álegg til að setja í sína snúða,“ segir Una Guðmundsdóttir matgæðingur DV.
Partýsnúðar
12 dl hveiti
1 bréf þurrger
4 dl mjólk (volg)
3 msk. ólífuolía
½ tsk. salt
Fyllinguna er svo gaman að hafa sem fjölbreyttasta, ég saxa gjarnan ólífur, pepperóní, sveppi og fleira gott með. Góð pitsusósa, óreganó og rifinn ostur eru lykilatriði og svo getur hver og einn útfært sína fyllingu.
Byrjið á því að blanda saman þurrgerinu og volgri mjólk. Setjið ólífuolíuna út í ásamt saltinu.
Setjið nánast allt hveitið saman við (gott að halda smáhveiti eftir til að hnoða með) og vinnið deigið vel.
Ég nota hnoðara á hrærivélinni minni og læt deigið hnoðast í um 5 mínútur.
Látið deigið hefast á hlýjum stað í að minnsta kosti 30 mínútur, oft gott að setja rakan klút eða stykki yfir hrærivélarskálina á meðan deigið er að hefa sig.
Þegar deigið er búið að hefa sig er það lagt á borð og munið að strá hveiti á borðið svo að deigið
festist ekki við. Hnoðið deigið vel saman, skiptið því í 2-3 hluta og fletjið út í aflanga hluta. Setjið góða pitsusósu, rifinn ost og allt það hráefni sem ykkur langar að hafa yfir deigið, rúllið svo upp og skerið hverja rúllu í um 10-12 bita. Leggið bitana á bökunarpappír / ofnplötuna, stráið óreganókryddi yfir og bakið við 220 gráður í 10-12 mínútur.