Fyrirtækið Foodco, sem rekur meðal annars Aktu Taktu, Eldsmiðjuna og Saffran, er nú búið að sameinast fyrirtækinu Gleðipinnanum, sem stendur á bak við Hamborgarafabrikkuna, Keiluhöllina, Blackbox og Shake&Pizza. Samkeppniseftirlitið samþykkti samrunann fyrr í dag. Jóhannes Ásbjörnsson, eða Jói eins og hann er oftast kallaður, er einn af aðaleigendum nýja félagsins sem mun heita Gleðipinninn.

Þeir tíu veitingastaðir sem tilheyra Gleðipinnanum eru American Style, Hamborgarafabrikkan, Eldsmiðjan, Blackbox, Saffran, Pítan, Aktu taktu, Kaffivagninn, Roadhouse, Keiluhöllin og Shake&Pizza.

„Sumir staðirnir eiga að okkar mati skilið að fá aðeins meiri ást en þeir hafa fengið að undanförnu og ætlum við einmitt að ráðast í metnaðarfullar og ástríkar aðgerðir á næstunni. Við ætlum að leggja enn meiri áherslu á gæði enda má lengi gott bæta. Undir okkar hatti verða bæði rótgrónir staðir og nýrri í bland og við erum svo heppin að innan okkar hóps eru meistarakokkarnir Eyþór Rúnarsson, Karl Viggó Viggósson og Viktor Örn Andrésson, sem ásamt fleiri góðum ráðgjöfum munu koma að vöruþróuninni hjá okkur,“ sagði Jói í fréttatilkynningunni um samrunann í ágúst.

Sjá einnig: Jói fær kaldar kveðjur í Matartips

Fyrirhugaður samruni vakti mikla athygli íslenskra netverja og vönduðu Matartipsarar Jóa ekki kveðjurnar. Meðal þeirra ummæla sem netverjar létu falla eru:

„Gangi þér vel. Hingað til hefur foodco eignarhald þýtt ört hrakandi gæði og metnað. Með allir áherslu á hagnað. Bíðum og sjáum.“

„Takk fyrir samveruna og góðan mat. Með foodco í spilunum vitum við öll hver vegur gæðanna er. En menn gera það sem vilja og óska þér áframhaldandi velferðar.“

„Þú gerðir samning við djöfullinn… til hamingju með það.“

Hvað segja lesendur?