fbpx
Fimmtudagur 26.nóvember 2020
Matur

Þetta borðar Guðrún Sóley á venjulegum degi

Guðrún Ósk Guðjónsdóttir
Laugardaginn 7. nóvember 2020 10:00

Guðrún Sóley. Aðsend mynd.

Ekki missa af Helstu tíðindum dagsins í pósthólfið þitt

Lesa nánar

Fjölmiðlakonan Guðrún Sóley hefur verið vegan undanfarin fjögur ár. Hún segir að lykillinn að góðri máltíð sé sósan og það skipti mestu máli að njóta þegar kemur að því að prófa sig áfram í veganisma.

Fjölmiðlakonan Guðrún Sóley Gestsdóttir hefur verið vegan í fjögur ár. Hún segist hafa tekið þá ákvörðun fyrir dýrin og umhverfið. „Ég gat hreinlega ekki lengur fundið nein rök sem mæltu gegn því,“ segir hún.

Guðrún Sóley gaf út matreiðslubók árið 2018, Grænkerakrásir Guðrúnar Sóleyjar, sem hlaut hin eftirsóttu Gourmand-verðlaun og var valin besta veganbók í heimi.

Ekki gleyma að njóta

Aðspurð hvort hún hafi ráð til þeirra sem vilja prófa sig áfram í vegan mataræði, segir Guðrún Sóley að það skipti mestu máli að njóta.

„Þetta er svo skemmtileg breyting og gaman að prófa alla þá skrilljón valkosti sem eru í boði. Kannski sniðugt að byrja á einföldum nótum: Prófa fyrst valmöguleika á veitingastöðum, panta heim vegan borgara, pitsur og annað gæðafæði. Næsta skref væri að umkringja sig innblæstri, vegan-væða algóryþmana með því að fylgja alls konar vegan týpum á samfélagsmiðlum,“ segir Guðrún Sóley og bætir við að Instagram sé endalaus gullnáma.

„Og byrja svo að prófa sig áfram á skemmtilegum og einföldum uppskriftum heima við, til dæmis þeim sem finna má á veganistur.is.“

Guðrún Sóley. Aðsend mynd.

Lykillinn að góðri máltíð

Ef einhver veit hvernig á að setja saman góða vegan máltíð, þá er það Guðrún Sóley. Hún segir að lykillinn sé sósa.

„Ég er sósubrjálæðingur, finnst bara allt betra með margföldu magni af sósu. Líka kryddstyrkur, það þarf að vera bragð af matnum og mér finnst hressandi að leika mér smá með kryddin – kaupa nýjar tegundir og blanda saman á ólíka vegu. Góð vegan máltíð er raunar náskyld góðri annars konar máltíð, því það sem hverjum og einum finnst gott, má auðveldlega yfirfæra á vegan forsendur,“ segir hún.

Þegar kemur að því að velja uppáhaldsmáltíð stendur Guðrún Sóley frammi fyrir erfiðu vali. „Úff. Ægilegt að velja. Þó ég dái alls kyns flókna froðu- og doppu delíkatessen matseld, þá finnst mér einfaldleikinn oft bestur. Gott ristað brauð með ilmandi ólífuolíu og smá salti finnst mér vera máltíð á heimsmælikvarða,“ segir hún.

Útivist nauðsynleg

Guðrún Sóley starfar sem dagskrárgerðarmaður hjá RÚV og lýsir hefðbundnum degi í lífi sínu.

„Ég er svo heppin að vera í dúndurskemmtilegri vinnu – dagarnir eru fjölbreyttir, við erum oftast á stökki milli staða að hitta listamenn og kynnast þeirra verkum og innblæstri. Þess á milli sit ég svo við tölvu og klippi, skrifa og skipulegg. Eftir vinnu reyni ég að koma einhvers konar útivist að. Fjallgöngur eru mitt uppáhald og fyrir mína parta hefur ferska loftið og nálægð við náttúruna verið lífsnauðsynlegt vítamín á kóftímum. Suma daga er hundalabbitúr um hverfið öll útivistin, sem er alls ekki síðra,“ segir hún.

Guðrún Sóley. Aðsend mynd.

Matseðill Guðrúnar Sóleyjar

Morgunmatur

Hafragrautur með möndlusmjöri. Sem oft vill verða samt möndlusmjör með smá hafragraut.

Millimál nr. 1

Suðusúkkulaði og kaffi.

Hádegismatur

Í kófinu frístæla ég bara eitthvað heima við, set kannski hummus, vegan ost, falafel, salat og ófyrirgefanlegt magn af sriracha-sósu í vefju.

Millimál nr. 2

Nýtt tvist á gamla klassík: Banani með tahini (sesamfræjasmjöri). Þetta er smá tilbrigði við dýrðina sem er epli með hnetusmjöri, mæli með.

Kvöldmatur

Hér kemur tilbúinn matur oftar til skjalanna en ég kæri mig að viðurkenna. En er ekki rétt að styðja veitingastaði borgarinnar á þrengingatímum? Ég reyni að minnsta kosti að láta ekki mitt eftir liggja og kaupi pitsur, indverskt, sushi og borgara eftir getu. Þegar ég elda er það oftast einfalt rjóma pasta eða BBQbúddaskál.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Matur
Fyrir 1 viku

5 uppáhalds veitingastaðir Ernu Hrundar – „Leynd perla í 104. Ódýrt, einfalt og ljúffengt.“

5 uppáhalds veitingastaðir Ernu Hrundar – „Leynd perla í 104. Ódýrt, einfalt og ljúffengt.“
Matur
Fyrir 4 vikum

Sykursætur súkkulaðidraumur í skammdeginu – Toblerone bomba

Sykursætur súkkulaðidraumur í skammdeginu – Toblerone bomba
Matur
26.10.2020

Gulrótarkaka sem hressir upp á grátt síðdegi – „Getur ekki klikkað“

Gulrótarkaka sem hressir upp á grátt síðdegi – „Getur ekki klikkað“
Matur
10.10.2020

Albert á nýju mataræði – Þetta borðar hann á venjulegum degi

Albert á nýju mataræði – Þetta borðar hann á venjulegum degi
Matur
09.10.2020

Nú er tími til að njóta – Hægeldað læri með tilheyrandi

Nú er tími til að njóta – Hægeldað læri með tilheyrandi