Heiða Björg Hilmisdóttir, varaformaður Samfylkingarinnar, deildi nýverið með okkur hvað hún borðar á venjulegum degi.

Hér deilir hún með okkur uppskrift að tandoori-kjúkling með kúskússalati og límónusósu.

Sjá einnig: Þetta borðar Heiða Björg á venjulegum degi

Tandoori-kjúklingur með kúskússalati og límónusósu

Fyrir 5

4 kjúklingabringur (u.þ.b. 800 g)

½ tsk salt og smá hvítur pipar

4 msk tandoorikrydd

2 msk góð grænmetisolía

Kúskússalatið góða:

5 dl vatn

2 msk ólífuolía

½  tsk flögusalt

2 ½ dl kúskús

½ laukur

2 hvítlauksgeirar

1 rautt chili

½  gúrka

1 avókadó

1 msk sítrónusafi

1 dl saxaður graslaukur (má setja vorlauk)

1 dl kóríander, saxað

2 tsk sesamolía

2 msk ólífuolía

Límónusósa:

1 sítróna, safi

1 límóna, safi

2 dl rjómaostur

Aðferð:

1. Skerið kjúklingabringurnar í jafnstóra bita. Stærðin skiptir ekki höfuðmáli en ef þeir eru jafn stórir eru þeir gegnsteiktir á sama tíma og þá er ekki hætta á að sumir bitar verði ofsteiktir og aðrir of lítið steiktir.
2. Setjið tandoori-krydd og salt og pipar í djúpan disk og veltið kjúklingabitunum upp úr því Hellið olíu í pönnu og steikið bringurnar  á pönnunni við meðal hita þannig að þær brúnist jafnt að utan.
3. Setjið u.þ.b. ½ dl af vatni á pönnuna, setjið lokið á og lækkið hitann og látið bringurnar eldast í gegn eða þar hitamælir sýnir 65°C kjarnhita. Þetta gæti tekið um það bil 20 mínútur. (Ef þú átt ekki kjarnhitamæli getur þú  prófað að skera einn bita í sundur til að fullvissa þig um að hann sé hvítur í gegn).
4. Setjið 5 dl vatn í pott ásamt 2 msk af ólífuolíu og 1 tsk af salti og látið suðuna koma upp.
5. Takið af hitanum, setjið kúskús út í, blandið saman og setjið lokið yfir. Látið standa í 5 mínútur.  Saxið lauk í þunnar ræmur, merjið hvítlaukinn létt með hnífnum og saxið smátt.
6. Skerið chili í tvennt og skafið fræin úr og saxið smátt. Flysjið gúrkuna með kartöfluskrælara og skerið í tvennt.
7. Skafið fræin innan úr með teskeið og skerið gúrkuna í litla teninga. Blandið kúskúsgrjónunum og grænmeti saman.
8. Skerið avókadó í bita, setjið þá út í og kreistið smá sítrónusafa yfir ( það kemur í veg fyrir að avókadóið verði dökkt að lit í salatinu).
9. Saxið graslauk og kóríander og hrærið létt  saman við ásamt ólífu- og sesamolíu.
10. Setjið allt sem á að fara í sósuna í matvinnsluvél og maukið saman.
11. Leggið salatið á diska eða eitt stórt fat. Raðið kjúklingabitunum ofan á og berið fram með límónusósunni.  Ef tími vinnst til skelli ég í fljótlegt Naan brauð

Gerlaust naan-brauð

6 stykki

8 dl hveiti

1 tsk lyftiduft

¾ tsk salt

2 msk olía

1½ dl hreint jógúrt

1 egg

1½ dl mjólk

olía til að pensla brauðið

Aðferð:

1. Blandið saman hveiti, lyftidufti og salti í skál og olíu, egg, jógúrt og mjólk í annarri skál. Hrærið þetta síðan allt saman og látið standa aðeins og jafna sig.
2. Stillið ofninn eins hátt og hann kemst, það er algengt að það sé 250°C.  Hnoðið deigið og skiptið í 6 jafna bita. Mótið hringlaga kökur,u.þ.b. 25×15 cm.
3. Setjið á bökunarplötu og bakið brauðin þar til þau hafa tekið lit, það tekur um það bil 5 mínútur.  Penslið brauðin með smá olíu þegar þau koma úr ofninum og vefjið inn í viskustykki.