Halla Björg Björnsdóttir sér um Ketóhornið á DV. Hér deilir hún ljúffengri uppskrift að súkkulaðibitasmákökum.
TikTok er að taka yfir allt þessa dagana. Samfélagsmiðill hefur stytt fólki stundir í inniverunni síðustu vikur. Síðast var það Dalgona kaffidrykkurinn sem var að gera allt vitlaust á miðlnum, en nú eru það súkkulaðibitakökur sem innihalda aðeins fimm hráefni og bráðna í munni.
Ég var ekki lengi að gera LKL/Ketó útgáfu af þessu sælgæti.
Það má segja að þessar hafi heldur betur slegið í gegn á heimilinu enda situr rúmlega helmingur fjölskyldunnar sveittur yfir námsbókum í próflestri og þá er ekki leiðinlegt að geta nartað í svona orkubombur.
Í kökurnar þarf einn bolla af hnetusmjöri. Ég nota hnetusmjör frá BodyLab sem hentar, að mínu mati, best fyrir LKL og Ketó. Það fæst bæði gróft og fínt en ég nota þetta grófa þar sem það gefur kökunum skemmtilegri áferð.
Hér er svo restin af hráefnunum.
1/3 bolli sukrin gold
1 egg
1 tsk matarsódi
½ bolli sykurlausir súkkulaði dropar
Hægt er að fá sykurlausa súkkulaðidropa hjá lowcarb.is
Þetta er allt hrært vel saman og úr þessu eru mótaðar 12 jafnstórar kökur sem eru því næst bakaðar á 175 gráðum í 10-12 mínútur.
Það er gott fletja kökurnar örlítið niður áður en þær fara í ofninn ef deigið er mjög þykkt og strá flögusalti yfir þær.
Kökurnar eru í fyrstu mjög mjúkar viðkomu en stífna svo þegar þær kólna. Og þá er bara að njóta með ískaldri ósætri möndlumjólk.
