Reglulega skjóta ný mataræði upp kollinum sem komast í tísku, líkt og ketó mataræðið hefur tröllriðið landanum síðustu mánuði. Nú er hins vegar komið nýtt mataræði sem á að vera enn betra en ketó ef fólk hefur í hyggju að léttast.
Mataræðið heitir á ensku „satiating diet“, sem væri hægt að þýða sem mettað mataræði. Það felst í því að borða prótein- og trefjaríkan mat, sem og holla fitu og sumar mjólkurvörur. Lykilatriði er að borða næringarríkan mat sem fyllir magann vel og er enginn fæðuhópur á bannlista á mettaða mataræðinu.
Meðal þess sem er tilvalið að borða á mettaða mataræðinu eru ávextir, grænmeti, avókadó, heilkorn, magurt kjöt og fiskur. Mælt er með því að borða 20 til 25 prósent prótein, 45 til 50 prósent kolvetni og 30 til 35 prósent fitu. Þeir sem eru á ketó vita að á því mataræði eru kolvetni í algjöru lágmarki.
Skýrsla í Scientific American, sem unnin var af lækninum Shirin Panahi, sýnir fram á að mettaða mataræðið geti hjálpað fólki að léttast og viðhalda heilbrigði og telur Shirin að mettaða mataræðið sé jafnvel betra en ketó mataræðið í þessum tilgangi.