Leikkonan Halle Berry hefur verið á ketó mataræðinu um árabil og hefur deilt ýmsum ráðum með fylgjendum sínum á Instagram. Á föstudögum tekur hún höndum saman með þjálfara sínum, Peter Lee Thomas, og tala þau um ýmislegt sem tengist heilsu og næringu í sögu hennar á Instagram.
Halle talaði mikið um ketó mataræðið í sögu sinni síðasta föstudag, meðal annars um hvernig hún hefur náð að vera á því svona lengi.
„Mér finnst mjög mikilvægt að svindla,“ sagði hún og hélt áfram. „Stundum þarf maður bara að borða það sem maður vill. Þú þarft að svala matarþránni og þá geturðu snúið aftur betri og sterkari.“
Þá talaði hún einnig um hvernig hún byrjaði á ketó en sagði jafnframt að það væri mjög persónubundið hvernig fólk tileinkar sér ákveðið mataræði. Halle dýfði sér bara strax í mataræðið af fullum krafti.
„Það er persónuleikinn minn. Ég dýfi mér bara í hlutina og tækla þá. Þannig er ég,“ sagði hún. Leikkonan sagði þá leið ekki henta öllum og mældi með því að fólk taki sér tíma ef það er ekki sannfært um ágæti ketó mataræðisins.
„Fikrið ykkur áfram hægt og rólega og sjáið hvort þessi lífsstíll hentar ykkur,“ sagði hún í Instagram-spjallinu.