Albert Eiríksson er annálaður matgæðingur og heldur úti matarblogginu Albert eldar, sem nýtur gífurlegra vinsælda á meðal Íslendinga.
Albert birtir færslu á síðunni þar sem hann varar lesendur við einni frægustu tertu heims – Sachertertunni. Tertan á uppruna sinn að rekja til Vínar í Austurríki og er eitt frægasta bakkelsið þar í landi. Um er að ræða þétta súkkulaðiköku með þunnu lagi af apríkósusultu ofan á. Herlegheitin eru síðan húðuð með dökku súkkulaðikremi.
Albert er ekki paránægður með tertuna frægu.
„Lengi hef ég átt mér þann draum að smakka Sachertertu, eina af frægustu tertum heims. Til eru allmörg kaffihús sem eiga það sameiginlegt að segjast notast við upphaflegu uppskriftina. Held ég hafi aldrei orðið fyrir eins miklum vonbrigðum með neitt kaffimeðlæti eins og þessa frægu Sachertertu sem við fengum á fallegu kaffihúsi í Austurríki. Þurr ofbökuð terta með svo þunnu lagi af apríkósusultu á milli að helst hefði þurft stækkunargler til að sjá það,“ skrifar hann.