Slökkviliðið í Ammon í Idaho í Bandaríkjunum fékk býsna óvenjulegt útkall á veitingastað á dögunum. Hópur ungmenna hafði komið á veitingastaðinn Chick-fil-A þegar ein stúlka í hópnum, hin sextán ára Addison Trent, féllst á að framkvæma áskorun eftir þrýsting frá vinum sínum.

Áskorunin var á þá leið að Addison átti að troða sér ofan í barnastól á veitingastaðnum. Ekki vildi betur til en svo að hún sat pikkföst í stólnum og báru ítrekaðar tilraunir vina hennar og starfsmanna til að losa hana engan árangur.

Því var brugðið á það ráð að hringja á slökkviliðið og það var ekki fyrr en liðsmenn þess komu á staðinn að þeim tókst að losa stúlkuna.

„Hún var nokkuð hress þegar við komum en virtist þó vera dálítið vandræðaleg. Vinir hennar voru líka á fullu að taka myndir fyrir Snapchat og Instagram – eins og unglingar gera,“ segir Jesse Williams, fulltrúi slökkviliðsins í Ammon.