Yfirvöld í New York hafa samþykkt frumvarp þess efnis að veitingastöðum og verslunum verði bannað að selja foie gras-lifrarkæfu.
Þessum tíðindum fagna dýravinir enda þykir framleiðsluaðferðin mjög umdeild. Kæfan er framleidd með því að þvinga fæðu ofan í gæsir og endur – afleiðingin er sú að lifrin í þeim stækkar mjög. Oft er notað rör til að þvinga fæðuna ofan í dýrin. Þeir sem gagnrýnt hafa aðferðina segja að verið sé að pynta dýrin en framleiðendur segja að dýrin kveljist ekki.
Ekki er búist við öðru en að Bill de Blasio, borgarstjóri New York, muni skrifa undir frumvarpið sem mun að óbreyttu taka gildi árið 2022.
Yfirvöld í Kaliforníu bönnuðu fois gras árið 2012 og yfirvöld í Chicago árið 2006 – þó bannið hafi verið afnumið þar tveimur árum síðar.