Marie Curie er ein merkasta kona mannkynssögunnar. Hún var fyrsta konan til að vinna Nóbelsverðlaun, en þau hlaut hún fyrir rannsóknir sínar á geislavirkni. Hún uppgötvaði radíum og pólóníum og lagði sitt á vogarskálarnar í baráttunni gegn krabbameini.
Það væri því ekkert sérstaklega skrýtið ef einhver myndi panta afmælisköku með mynd af Marie Curie á, en ein kona í Englandi fékk slíka köku algjörlega óumbeðið.
„Frænka mín í Englandi sagði vinnufélögunum að hún vildi afmælisköku með mynd af Mariah Carey. Þeir misskildu það og þetta er kakan sem þeir gáfu henni í staðinn. Þetta er Marie Curie, í stuði,“ skrifar rithöfundurinn Harriet Lye á Twitter.
My cousin in England told her colleagues she wanted a Mariah Carey birthday cake. They misunderstood, and is the cake they made her instead. It’s Marie Curie, looking very festive. pic.twitter.com/LMHJnMATqD
— Harriet Alida Lye (@harrietalida) June 14, 2019
Mariah Carey er, eins og margir vita, heimsfræg söngkona sem hefur unnið til fjölda verðlauna á ferlinum. Hún hefur náð mjög langt á sínu sviði, líkt og Marie Curie gerði forðum. Það er líklegast það eina sem þær stöllur eiga sameiginlegt, en misskilningurinn með kökuna er bráðfyndinn samt sem áður.