Sarep Baggott missti 27 kíló og kom sér í hörkuform í leiðinni. Hún segir frá sögu sinni í Women‘s Health Magazine.
Sarep segir að hún byrjaði að þyngjast eftir að hún eignaðist kærasta, sem nú er eiginmaður hennar, þegar hún var 16 ára. Næstu árin þyngdist hún og varð síðan ófrísk þegar hún var tvítug, árið 2011.
„Ég var örugglega um 65-68 kíló. Einn mánuðinn þyngdist ég um tæplega sex kíló, og læknirinn minn benti mér á að það væri frekar mikið, en ég gat ekki stjórnað hversu mikið ég var að borða,“ segir Sarep.
„Eftir að ég eignaðist son minn í febrúar 2012 var ég um 83 kíló. Á þessum tímapunkti vissi ég að ég ætti að gera eitthvað varðandi þyngd mína og matarvenjur mínar, en sem nýbökuð móðir þá var erfitt að búa til tíma fyrir sjálfa mig. Ég var að vinna frá átta til fjögur og þurfti einnig að hugsa um son minn.“
Næstu árin segist Sarep hafa lifað sama lífsstíl og vó um 77 kíló. Hún varð síðan ófrísk af sínu öðru barni sem hún fæddi í mars 2015.
„Ég var þá aftur í kringum 83 kíló. Ég var á þessum tíma heimavinnandi móðir. Eiginmaður minn ákvað að hann vildi borða hollara og fara í ræktina. Ég studdi hann en var ekki tilbúin að fylgja honum í þessari heilsu vegferð,“ segir Sarep.
„Allavega ekki fyrr en ég sá árangur hans eftir fyrsta mánuðinn. Ég bókstaflega hugsaði með sjálfri mér: „Omg… ég get ekki verið stóra konan með geðveikt heitan eiginmann.“ Þessi hugsunarháttur lét mér ekki líða vel. Í staðinn hvatti hann mig áfram og ég ákvað að vera samferða eiginmanni mínum í leit að heilbrigðum lífsstíl.“
Sarep segir að hún vissi að hún þyrfti að borða minna. Hún notaði MyFitnessPal til að fylgjast með kaloríufjölda sem hún innbyrti og setti sér markmið.
„Ég elska hrísgrjón og pasta og ég vissi að ég myndi ekki geta fylgt einhverju mataræði til langtíma ef ég myndi taka alveg út mat sem ég elska. Þannig ég skipti þeim út, ég skipti út einföldu kolvetni eins og hvítum hrísgrjónum fyrir flókin kolvetni eins og brún hrísgrjón. Ég skipti út venjulegu pasta fyrir heilhveiti og prótein pasta. Og ég skammtaði mér hverja máltíð.“
Máltíðir Sarep voru eins einfaldar og hugsast getur.
„Ég borðaði örugglega brún hrísgrjón og hunangs og BBQ kjúklingabringur alla virka daga fyrstu sex mánuðina. Um helgar borðaði ég það sem ég vildi en reyndi að taka góðar ákvarðanir og borða ekki of stóra skammta.“
Sarep tók samt ekki einungis mataræðið í gegn heldur byrjaði hún að hreyfa sig einnig. „Ef ég á að vera hreinskilin þá var ég hrædd við ræktina. Fyrstu mánuðina gerði ég einungis brennsluæfingar í hálftíma og notaði alls konar tæki í hálftíma. En vissi ekkert hvað ég var að gera. Núna geri ég styrktaræfingar og HIIT æfingar. Ég æfi fjóra daga í viku, 40 mínútur í senn.“
Hún segist hafa lært mikilvæga lexíu:
„Ég veit það núna að það er ekki sjálfselska að taka klukkutíma á dag frá börnum mínum til að vinna í sjálfri mér, minni heilsu og hreysti […] Ég var með það á heilanum að vera með börnunum mínum 24/7 og gat ekki ímyndað mér að gera eitthvað fyrir mig sjálfa. Ég þurfti að segja við sjálfa mig að það er í lagi að hugsa um sjálfa mig og fjölskyldu mína.“
Að lokum gefur Sarep öðrum ráð:
„Ég vil minna aðrar konur á að þetta tekur tíma. Vertu stefnuföst og þolinmóð. Og mundu, þú færð það sem þú gefur í þetta. Ég vaknaði ekki alltaf klukkan hálf fimm á morgnanna full af orku og metnaði til að fara í ræktina, en það var eini tími dags sem ég hafði tíma til að gera það!“