Lessie Brown, sem seint á síðasta ári var talin vera elsti, lifandi Bandaríkjamaðurinn, lést í vikunni. Lessie var 114 ára gömul.
Lessie fæddist í Georgíu árið 1904 og ólst upp á sveitabæ. Hún var ein af tólf börnum foreldra sinna en þegar hún óx úr grasi flutti hún til Cleveland. Alla ævina gerði hún tvennt á hverjum einasta degi. Hún fór í kirkju og borðaði að minnsta kosti eina sæta kartöflu á hverjum degi.
Í umfjöllun um Lessie í Cleveland Magazine í september í fyrra kemur fram að börn hennar og ættingjar telja að lykillinn að þessu langlífi sé einmitt þessi eina sæta kartafla á dag. Í viðtali við WJW-TV árið 2013 gaf Lessie lítið fyrir þær fullyrðingar fjölskyldumeðlimanna.
„Æi, ég veit það ekki. Margir segja að það sé út af því að ég borða mikið af sætum kartöflum, en ég held að það sé ekki ástæðan. Ég veit það ekki, ástæðan er kannski vilji Guðs.“
Sætar kartöflur eru hins vegar talin ofurfæða og hollari en hefðbundnar kartöflur. Meðalstór sæt kartafla inniheldur 103 kaloríur, 24 grömm af kolvetnum, enga fitu og 4 grömm af trefjum.
