Snapparinn og grillkóngurinn Alfreð Fannar Björnsson er lesendum matarvefsins vel kunnugur en hann er þekktur sem Alli-tralli á Snapchat og BBQ kóngurinn á Instagram. Alfreð ákvað að láta draum rætast á dögunum og bjó til brenndar möndlur á grillinu heima, líkt og brenndu möndlurnar sem eru svo lokkandi á jólamörkuðum.
„Hver hefur ekki lent í því að vera á jólamarkaði og finna þvílíkt góða lykt? Svo finnur maður hvaðan lyktin kemur og þá er einhver að hræra í potti sem er fullur af möndlum og sykri. Maður kaupir einn poka og áður en maður veit af er pokinn búinn,“ segir Alfreð og hlær. Hann sér ekki eftir því að hafa gert möndlurnar heima á grillinu, en vert er að taka fram að einnig er hægt að nota eldavélina til möndlugerðar.
„Lyktin á pallinum var unaðsleg.“
Við getum auðvitað ekki sleppt Alfreð áður en hann gefur okkur uppskrift að ekta brenndum möndlum – góðgætið sem hringir inn jólin.
Hráefni:
200 g möndlur
1 dl vatn
175 g sykur
1/2 tsk kakó
1/2 tsk vanillusykur
Aðferð:
Leyfið pönnunni að hitna vel. Blandið saman sykri, kakó, vanillusykri og möndlum. Hellið vatninu á vel heita pönnuna og síðan möndlublöndunni. Hrærið í þessu í um það bil fimmtán mínútur, eða þar til sykurinn er farinn að kristallast. Þá er pannan tekin af hitanum og blöndunni hellt á smjörpappír og leyft að kólna.
Hér fyrir neðan eru síðan annars konar brenndar möndlur sem hægt er að gera með sömu aðferð.
Hráefni:
200 g möndlur
175 g sykur
safi úr 1/2 appelsínu
1 tsk kanill
1/2 tsk cayenne pipar
1/2 tsk vanillusykur
1 dl vatn
