Breska konungsfjölskyldan metur einkalíf sitt mikils, en í ár hafa hins vegar kokkar og bakarar fjölskyldunnar gefið almúganum innsýn í lífið í höllinni á bloggsíðu fjölskyldunnar.
Í nýlegri bloggfærslu ljóstra konunglegu bakararnir upp uppskrift að piparkökunum sem borðaðar eru meðal kóngafólksins og ku þær vera í miklu uppáhaldi.
„Það er alltaf best að láta deigið hvíla þannig að það er frábært ef hægt er að búa til deigið kvöldið áður en kökurnar eru bakaðar,“ segir einn bakarinn í bloggfærslunni.
„Einnig er hægt að fletja deigið út, skera út form og setja kökurnar í frysti í um klukkustund. Það tryggir að þær halda lögun sinni.“
Eins og sést á myndum sem fylgja færslunni er mikill metnaður lagður í að skreyta kökurnar, en þær eru einnig notaðar sem jólaskraut. Mikilvægt er að leyfa glassúrnum að þorna alveg áður en borði er þræddur í gegnum gat sem búið er til áður en kökurnar eru bakaðar.
Hér kemur uppskriftin fræga, en í henni er kveðið á um eitthvað sem kallað er „mixed spice“. Það er bresk kryddblanda sem inniheldur múskat, kanil, negul og allspice. Athygli vekur að ekkert síróp er í uppskriftinni eins og er í mörgum piparkökuuppskriftum, heldur bæði púðursykur og hvítur sykur.
Hráefni:
200 g hveiti
1 tsk. engifer
1 tsk. „mixed spice“
100 g ósaltað smjör
75 g púðursykur
25 g sykur
45 g mjólk
glassúr til skreytinga
Aðferð:
Sigtið hveiti og krydd saman. Skerið smjörið í teninga og vinnið það inn í hveitiblönduna með fingrunum. Bætið púðursykri saman við. Bætið mjólkinni vel saman við og myndið kúlu úr deiginu. Vefjið það inn í plastfilmu og leyfið því að hvíla í að minnsta kosti 2 klukkutíma (best að leyfa því að hvíla yfir nótt). Hitið ofninn í 180°C. Fletjið deigið út og skerið út kökur. Klæðið ofnplötu með smjörpappír og raðið kökunum á plötuna. Stráið smá sykri ofan á og bakið þar til kökurnar ná lit. Leyfið kökunum að kólna alveg áður en þær eru skreyttar.
