Smákökurnar á Subway eru í uppáhaldi hjá mörgum en þessi uppskrift nær að endurgera þær og meira til. Leynihráefnið er Royal-búðingsduft sem gefur kökunum meiri mýkt og betra bragð.
Hráefni:
155 g mjúkt smjör
1/2 bolli púðursykur
1/4 bolli sykur
1 pakki Royal-vanillubúðingur
1/4 tsk. vanilludropar
1 egg
1 1/2 bolli hveiti
1/2 tsk. lyftiduft
1/2 tsk. matarsódi
1/4 tsk. sjávarsalt
50 g hvítt súkkulaði (saxað)
50 g Brak (eða hvað sem þið viljið)
50 g Appollo-lakkrís (skorinn í bita – eða eitthvað annað góðgæti)
Aðferð:
Hitið ofninn í 180°C og setjið smjörpappír á ofnplötur. Blandið smjöri, púðursykri og sykri mjög vel saman. Bætið því næst vanillubúðingnum saman við.
Bætið vanilludropum og eggi vel saman við. Blandið hveiti, lyftidufti, matarsóda og salti vel saman í annarri skál og bætið því næst út í smjörblönduna.
Blandið nammi varlega saman við með sleif eða sleikju. Raðið kökunum á plöturnar og bakið í 10-12 mínútur.
