Jólin nálgast óðfluga en það er enginn sem segir að smákökubakstur sé eyrnamerktur jólunum. Það er tilvalið að baka smákökur hvenær sem löngunin vaknar, en þessar smákökur eiga klárlega eftir að koma þér í mjúkinn hjá erfiðustu vinnufélögunum. Algjört konfekt!

Súkkulaði- og karamellu smákökur

Hráefni:

2½ bolli hveiti
¾ bolli kakó
1 tsk. matarsódi
½ tsk. salt
280 g mjúkt smjör
2 bollar sykur
2 tsk. vanilludropar
2 stór egg
40 rjómakaramellur
sjávarsalt

Aðferð:

Hitið ofninn í 180°C, takið til ofnplötur og klæðið þær með smjörpappír. Blandið hveiti, kakó, matarsóda og salti saman og setjið til hliðar. Þeytið smjör og sykur vel saman í um 3 til 5 mínútur. Bætið síðan vanilludropunum og eggjunum út í og blandið í um 1 mínútu til viðbótar. Blandið þurrefnunum saman við í þremur hollum og skrapið deigið af skálarbörmunum eftir hvert holl. Kælið deigið í ísskáp í 10 mínútur. Búið síðan til meðalstórar kúlur úr deiginu og fletjið þær á milli lófanna. Setjið eina karamellu í miðjuna á hverri köku og hyljið hana með kökudeiginu. Raðið kökunum á ofnplöturnar og passið að hafa smá pláss á milli þeirra þar sem þær dreifa úr sér. Bakið kökurnar í 9 til 11 mínútur og stráið sjávarsalti á þær um leið og þær koma úr ofninum. Leyfið þeim að kólna aðeins áður en þær eru étnar upp til agna.