Í aldaraðir hefur verið hefð innan kristinnar trúar þar sem lögð er áhersla á kyrrð og íhugun. Margir er tilheyra mystískri hefð kristninnar hafa verið sannfærðir um að maður heyri fyrst eitthvað í þögninni.

Næsta sunnudag kl. 11:00 verður íhugunarmessa í Vídalínskirkju í Garðabæ. Hún fylgir að mestu leyti þeirri röð sem venjuleg messa gerir en upplifunin er önnur þar sem áherslan er á kyrrð og íhugun. Í stað þess að orða bænir iðkum við kyrrðarbæn þar sem engin þörf er á orðum. Í stað þess að hlýða á prédikun heyrum við sama textann lesinn og íhugum hann sjálf. Við tökum síðan það sem hann segir okkur með okkur út í hið daglega líf og nýja viku. Það má því segja að allir taki ábyrgð á sinni upplifun. Áherslan er á kyrrláta þátttöku allra viðstadda.

Tónlistin í íhugunarmessunni sem er leidd af Jóhanni Baldvinssyni organista og félögum úr Kór Vídalínskirkju tekur einnig mið af íhugunarvíddinni. Talsvert verður sungið að einföldum söngvum og einnig tónlist sem miðlar hugmyndum um kyrrð og íhugun.

Íhugunarmessan er spennandi stund fyrir þá sem sækja í kyrrðina og íhugunina.