Nú geta heimsendaspámenn bara pakkað niður og hætt að koma með hörmungaspár um yfirvofandi pólskipti sem myndu hafa miklar hörmungar í för með sér. Vísindamenn segja að pólskipti séu ekki yfirvofandi í fyrirsjáanlegri framtíð.

Þetta kemur fram í fréttatilkynningu frá vísindamönnum við háskólann í Liverpool. Fjölmiðlar fjölluðu margir nýlega um mælingar sem bentu til að segulpólar jarðarinnar væru að fara að skipta um stað þannig að segulpóllinn á norðurskautinu myndi flytja sig yfir á suðurskautið og öfugt.

Á vef Videnskab.dk kemur fram að ef til pólskipta kemur geti það hafa ófyrirsjáanlegar og alvarlegar afleiðingar fyrir stóran hluta þeirra rafeindatækja sem við notum í dag. Til dæmis gætu gervihnettir farið illa út úr þessu. Sumir telja einnig að pólskipti geti haft slæm áhrif á loftslagsmálin.

Vangaveltur um pólskipti hafa verið meiri undanfarið en oft áður þar sem mælingar sýna að segulsvið jarðarinnar hefur veikst á undanförnum 200 árum.

Vísindamenn hafa nú rannsakað tvo „nýlega“ atburði, fyrir 34.000 og 41.000 árum síðan, þar sem pólarnir skiptu næstum um stað. Það gerðist þó ekki og vísindamennirnir reikna ekki með að það gerist að þessu sinni.