Maður sem allt bendir til að sé ættaður frá Rúmeníu hefur verið ákærður fyrir að hafa tekjur af vændi annara og peningaþvætti, meðal annars með því að nýta sér spilakassa Happdrættis Háskóla Íslands. Vændisstarfsemin fór fram á Akureyri og víðar um land en það er lögreglustjórinn á Norðurlandi eystra sem leggur ákæruna fram.
Maðurinn er með rúmenskt nafn og er um fertugt. Samkvæmt ákærunni er hann með íslenska kennitölu og var áður skráður til heimilis í Reykjavík. Hann er nú skráður með lögheimili í útlöndum en samkvæmt ákærunni er talið sennilegt að hann búi í Rúmeníu.
Ákæran er birt í Lögbirtingablaðinu þar sem ekki hefur tekist að birta manninum ákæruna.
Samkvæmt ákærunni hafði maðurinn frá október 2023 til 20. október 2024 atvinnu og tekjur af því að hafa milligöngu og aðstoða aðila sem voru að selja vændi á Akureyri og annars staðar á Íslandi. Milligangan hafi falist meðal annars í því að vera í samskiptum við vændiskaupendur, skipuleggja ferðir vændisfólks til landsins og panta hótelherbergi fyrir vændisstarfsemina.
Maðurinn er síðan ákærður fyrir peningaþvætti með því að hafa frá 22. október 2023 til 22. október 2024, tekið við, nýtt og aflað sér ávinnings að fjárhæð 5.681.787 krónur, með vændi annarra, eða annarri ólöglegri starfsemi, og meðal annars umbreytt slíkum ávinningi og flutt hann og geymt. Ávinningurinn sé talinn stafa aðallega af vændisstarfseminni sem maðurinn hafi séð um að skipuleggja og hafa milligöngu um. Hann hafi umbreytt hagnaði af starfseminni í lögmætt fjármagn með því til dæmis að leggja peningana inn á eigin bankareikninga og nýta sér spilakassa Happdrættis Háskóla Íslands til peningaþvættis.
Með ákærunni fylgir sundurliðun á fjárstreymi inn á fjóra bankareikinga mannsins hérlendis, tvo í Landsbankanum, einn í Arion banka og einn í Íslandsbanka. Tíundaðar eru óútskýrðar greiðslur frá einstaklingum, óútskýrðar innlagnir mannsins sjálfs í reiðufé, óútskýrðar reiðufjárinnlagnir í erlendum gjaldeyri og óútskýrðar innlagnir frá Háskóla Íslands en þar er væntanlega átt við spilakassana. Upphæðin í síðastnefnda flokknum nemur samtals um einni og hálfri milljón króna. Óútskýrðar greiðslur inn á reikninga mannsins, samkvæmt sundurliðuninni, námu samtals eins og áður segir um 5,7 milljónum króna og samkvæmt ákærunni er þar um ávinning af milligöngu um vændi að ræða.
Þess er einnig getið í ákærunni að þegar maðurinn var handtekinn hafi verið haldlagðar hjá honum 175.280 krónur en hvaðan þeir fjármunir hafi komið sé óútskýrt.
Þess er krafist að maðurinn verði dæmdur til refsingar og sæti upptöku á ávinningnum af vændisstarfseminni og fénu sem fannst hjá honum þegar hann var handtekinn.
Málið verður tekið fyrir við Héraðsdóm Norðurlands eystra í maí næstkomandi. Mæti maðurinn ekki verður það metið sem ígildi játningar.
