Grímur Atlason, framkvæmdastjóri Geðhjálpar, segir þá útlendinga sem dvelja í fangelsum landsins að stórum hluta vera burðardýr eða aðra sem starfa í neðanjarðarhagkerfinu. Þetta kerfi sé knúið áfram af efri- og millistéttinni í landinu sem hafi óseðjandi eftirspurn eftir kókaíni og vændi.
„Umræða um fólk sem öðruvísi á litinn en meðal Þingeyingurinn er ógeðfelld í meira lagi,“ segir Grímur í færslu á samfélagsmiðlum í dag.
Vísar hann í grein Þorbjargar Sigríðar Gunnlaugsdóttur dómsmálaráðherra um að ríkisstjórnin hefði tekið af skarið í útlendingamálum og svo í hlaðvarp Þórarins Hjartarsonar þar sem fjallað er um „hinn nýja veruleika“ í kjölfar Hamas fréttar Morgunblaðsins, sem reyndist vera falsfrétt.
„Fangelsin eru full af erlendum glæpamönnum sem dómsmálaráðherra er alveg blóðugur upp fyrir axlir að sýna hörku gagnvart. Og Íslendingar verða sannfærðari og sannfærðari um að brúnt fólk sé meinsemdin í íslensku samfélagi,“ segir Grímur. „En hvaða erlenda fólk er það sem situr í fangelsum á Íslandi og hvers vegna?“
Annars vegar séu þetta einstaklingar sem komu hingað en fengu ekki landvistarleyfi og bíða brottvísunar. Hins vegar séu þetta burðardýr og einstaklingar sem tilheyra neðanjarðarhagkerfinu, svokölluðum undirheimum.
„Í þessum undirheimum snúast viðskiptin mest um fíkniefni og vændi. Rannsóknir benda til þess að eftirspurnin sé drifin áfram af milli- og efristéttinni í landinu. Íslendingar kaupa sér nefnilega kókaín og kynlíf í meira mæli en nokkru sinni fyrr,“ segir Grímur. „Burðardýrin og fótgönguliðar undirheimanna er fólkið frá útlöndum sem situr í fangelsunum. Það sem viðheldur þessu er eftirspurn Íslendinga eftir því sem er á þessum markaði.“
Þá segir hann að „hreinsunarátak“ dómsmálaráðherrans sé aðeins til heimabrúks og skipti í raun og veru engu máli.
„Skiptir engu hversu margir voru teknir á Laugaveginum í gær og sendir rakleiðis til útlanda – eins og lögreglan tilkynnti á Facebook í fyrradag. Kókaínnasirnar og viðskiptavinir kampavínsklúbbanna þurfa sitt,“ segir hann.
Ef fólk hafi ekki áttað sig á þessu enn þá viðhaldi refsistefnan gagnvart fíkniefnum jaðarsetningu fólks og heldur því í þrældómi.
„Að kenna brúnu fólki um nýjan veruleika á Íslandi er andstyggilegur rasismi og ekkert annað. Spyrjið bara fólkið í Mexíkó og á valmúaökrum Afganistans fyrir hvern það er að þræla,“ segir hann að lokum.
