Þingsályktunartillaga um þjóðaratkvæðagreiðslu um framhald viðræðna um aðild Íslands að Evrópusambandinu er til umræðu á Alþingi í dag. Þingfundurinn hófst með látum þar sem hver stjórnarandstöðuþingmaðurinn á eftir öðrum steig fram undir liðnum Fundarstjórn forseta til að gagnrýna ríkisstjórnina.

Diljá Mist Einarsdóttir þingmaður Sjálfstæðisfólks sakaði utanríkisráðherra um að hafa sniðgengið lögbundið samráð við utanríkismálanefnd. Sigmundur Davíð Gunnlaugsson þingmaður Miðflokksins sakaði ríkisstjórnina um að hafa „falið Evrópusambandsbrölt sitt fyrir þjóðinni“ sem og Alþingi og þar með brotið lög. Jóhann Friðrik Friðriksson þingmaður Framsóknar viðurkenndi að það hafi legið fyrir að þjóðaratkvæðisgreiðslan kæmi til umræðu á þingi, en þá að höfðu samráði við utanríkismálanefnd, sem var ekki gert hér.

Áfram héldu andstöðuliðar að gera athugasemdir við þetta samráðsleysi og sögðu risastórt mál að ráðamenn þjóðarinnar brytu þingskapalög með þessum hætti.

Stjórnarliðar gáfu þó lítið fyrir ásakanirnar. Ingvar Þóroddsson þingmaður Viðreisnar sagði ásakanirnar hreinlega hlægilegar. Tilvitnuð ákvæði þingskapalaga eigi að koma í veg fyrir að ríkisstjórnir taki einhliða ákvarðanir um breytingar á utanríkisstefnu landsins án aðkomu Alþingis eða samráðs við Alþingi. Hér sé verið að ræða beint samráð við þjóðina í gegnum þjóðaratkvæðisgreiðslu.

Þorgerður Katrín Gunnarsdóttir utanríkisráðherra benti á að utanríkismálanefnd fær til sín þingsályktunartillögu eftir fyrstu umræðuna og þá verða boðaðir til nefndarinnar gestir og sérfræðingar. Hér sé um að ræða þjóðaratkvæðisgreiðslu og skipulagningu hennar sem sé fyrst og síðar innanríkismál. Hún segir að upphrópanir stjórnarandstöðunnar bendi til þess að hún óttist þjóðina sína. „Í guðanna bænum, treystið þjóðinni fyrir þessu máli.“

María Rut Kristinsdóttir þingmaður Viðreisnar telur stjórnarandstöðuna vera að setja á svið leikrit sem hafi um margt verið fyrirséð. Allt tjald um leynimakk við embættismenn í Brussel sé fjarstæðukennt enda hafi legið fyrir allt frá því að stjórnarsáttmálinn var kynntur að þjóðaratkvæðisgreiðslan væri á dagskrá ríkisstjórnarinnar.

„Ég hlakka til að taka þetta samtal en í guðanna bænum hættum við þessu leikriti. Þetta er hjákátlegt.“

Segja má að hitinn sé við suðumark í þingsalnum í dag. Stjórnarandstaðan sakar ríkisstjórnina meðal annars um uppgjöf gagnvart verðbólgu og vöxtum á meðan stjórnarliðar furða sig á uppþoti vegna máls sem á að leggja í dóm þjóðarinnar með beinum hætti og sem var auk þess liður í stjórnarsáttmála ríkisstjórnarinnar.