Stjórnmálafræðingurinn Viktor Orri Valgarðsson, segir það ósvífna hræsni að saka forsætisráðherra um kosningasvik vegna fyrirhugaðrar þjóðaratkvæðisgreiðslu um hvort aðildarviðræður verði hafnar við Evrópusambandið að nýju. Sérstaklega þegar ásakanir komi frá aðilum sem hafa sjálfir svikið kjósendur.

„Það er alveg ótrúlega ósvífin hræsni hjá mönnum eins og Sigmundur Davíð Gunnlaugsson og Óli Björn Kárason að tala um það sem einhvers konar kosningasvik hjá Kristrúnu Frostadóttur að hafa sagt fyrir kosningar að aðildarviðræður við ESB væru ekki sérstaklega á dagskrá hjá henni.

Þegar þessir sömu menn mynduðu ríkisstjórn árið 2013 sem hafði gefið kýrskýr kosningaloforð um að halda þessa þjóðaratkvæðagreiðslu og sviku það loforð síðan blákalt.“

Viktor rifjar upp að fyrir kosningarnar 2013 hafi Sigmundur orðrétt sagt að almenningur ætti að ráða því hvort viðræðunum yrði haldið áfram og að þjóðaratkvæðagreiðsla myndi fara fram.

„Þannig að núverandi ríkisstjórn er bara að efna 13 ára gamalt kosningaloforð Sigmundar og Sjálfstæðisflokksins sem þau sviku þjóðina um þá.
Og svo það sé alveg skýrt þá er eitt að lofa því að flokkur muni ekki gera eitthvað í ríkisstjórn og allt annað að segja að það sé ekki sérstakt áhersluatriði hjá flokknum.“

Varla hafi það farið framhjá Sigmundi og Óla Birni að Viðreisn hafi lagt sérstaka áherslu á þjóðaratkvæðisgreiðslu um ESB í sinni kosningabaráttu.

„Þegar þau svo mynda ríkisstjórn með flokki sem hafði ekki sett það á oddinn, en er fylgjandi ESB-aðild, þá er nákvæmlega ekkert óeðlilegt eða óviðbúið við að það sé niðurstaða meirihlutaviðræðna þeirra.“

Við þetta má svo bæta að í stefnuyfirlýsingu ríkisstjórnarinnar, frá 21. desember 2024 kemur fram:

„Þjóðaratkvæðagreiðsla um framhald viðræðna um aðild Íslands að Evrópusambandinu fer fram eigi síðar en árið 2027.“