Sænskur maður, fæddur árið 2000, stefndi íslenska ríkinu og krafðist þess að felldir yrðu úr gildi úrskurðir Útlendingastofnunar þess efnis að honum yrði vísað úr landi og hann settur í tíu ára endurkomubann til landsins.
Þessar ákvarðanir voru grundvallaðr á 95. grein laga um útlendinga en samkvæmt henni er heimilt að vísa EES- eða EFTA-borgara úr landi ef það er nauðsynlegt með skírskotun til allsherjarreglu, almannaöryggis eða almannaheilbrigði.
Í úrskurðunum var vísað til þess að maðurinn var grunaður um að taka þátt í skipulagðri brotastarfsemi og vera meðlimur í sænskum glæpasamtökum. Einnig hefur hann verið grunaður um fjölmörg alvarleg afbrot á Íslandi og í Svíþjóð. Hann er meðal annars ákærður fyrir að taka þátt í íveikju á bíl lögreglukonu við Rekagranda árið 2023. DV hefur fjallað mikið um það mál:
Í stefnu sinni sagðist maðurinn vera saklaus af öllum kærum og ákærum en hafa þolað tilhæfulausar lögreglurannsóknir. Fram kemur í dómnum að maðurinn hefur hluta af dvöl sinni á Íslandi lifað á bótum frá velferðarsviði Reykjavíkurborgar en hluta af tímanum verið í vinnu.
Það var niðurstaða Héraðsdóms Reykjavíkur að sýkna íslenska ríkið af kröfum mannsins og brottvísun hans úr landi og tíu ára endurkomubann eru því áfram í gildi.
Dóminn má lesa hér.
