„Ef þeir byrja að hengja fólk þá munið þið sjá ýmislegt gerast,“ sagði Trump í gærkvöldi. Ummælin féllu í kjölfar frétta af yfirvofandi aftöku á hinum 26 ára Erfan Soltani sem handtekinn var í síðustu viku. Hann hefur verið dæmdur til dauða og segja aðstandendur hans að til standi að taka hann af lífi í dag.
Trump var staddur í verksmiðju Ford í Detroit í gær þegar hann ræddi við blaðamenn. Hann sagðist ekki hafa heyrt um yfirvofandi aftökur en sagði að gripið yrði til harðra aðgerða ef til þeirra kemur.
BBC ræddi í morgun við Awyer Shekhi, fulltrúa mannréttindasamtakanna Hengaw, en hann segist óttast að fleiri en Soltani hafi verið dæmdir til dauða. Þar sem aðgangur að Internetinu er takmarkaður í landinu hefur það reynst mannréttindasamtökum erfitt að nálgast upplýsingar.
Systir Soltani, sem er lögfræðingur, segir að yfirvöld hafi gefið fjölskyldunni þau skilaboð að þau fái að hitta hann í stutta stund áður en hann verður tekinn af lífi. Fjölskyldan hafi þó ekkert heyrt frá honum síðan hann var handtekinn. „Hann er bara einhver sem er á móti því ástandi sem ríkir í landinu. Og núna hefur hann fengið dauðadóm fyrir að láta þá skoðun í ljós,“ segir hún.
Donald Trump hefur hvatt mótmælendur í Íran til að halda uppteknum hætti og hann hefur sagt að aðstoð sé á leiðinni frá Bandaríkjunum. „Það er mikil hjálp á leiðinni, í ýmsum myndum,” sagði Trump í gær.
Mannréttindasamtök í landinu segja að yfir 2.500 manns hafi verið drepnir í mótmælunum, en í þeim hópi eru 147 laganna verðir og um 2.400 mótmælendur. Tólf þeirra sem hafa látist eru undir átján ára, að því er segir í frétt BBC.
