Samkvæmustu nýjustu tölum, sem eru frá febrúar síðastliðnum, voru 2/3 hlutar þeirra sem þáðu fjáhagsaðstoð frá Reykjavíkurborg með erlent ríkisfang.

Þetta kemur fram í minnisblaði frá Reykjavíkurborg sem tekið var saman fyrir velferðarnefnd Alþingis. Óskaði nefndin eftir minnisblaðinu til að fá frekari upplýsingar um atvinnulausa og þá sem þiggja fjárhagsaðstoð frá borginni en nefndin er með til meðferðar frumvarp til breytinga á lögum um atvinnuleysistryggingar en samkvæmt frumvarpinu yrði bótatímabil atvinnuleysisbóta stytt. Fulltrúar í velferðarráði hafa áður lýst yfir áhyggjum af frumvarpinu.

Lýsa yfir miklum áhyggjum af styttingu tímabils atvinnuleysisbóta – Muni bitna harkalega á sveitarfélögunum

Fram kemur í minnisblaðinu að samkvæmt reglum um fjárhagsaðstoð Reykjavíkurborgar sé grunnupphæð fjárhagsaðstoðar til framfærslu fyrir einstakling sem býr hjá foreldri eða foreldrum 129.976 krónur á mánuði. Fyrir einstakling sem búi einn sé upphæðin 259.951 á mánuði em fyrir einstakling sem býr með öðrum 219.021 króna á mánuði. Fyrir hjón er síðan upphæðin 415.922, krónur á mánuði.

Tekið er fram að samkvæmt reglunum skerði allar eignir umfram húsnæði og bifreið rétt til fjárhagsaðstoðar til framfærslu, inneignir í banka þar með talið. Eignir hjóna séu ávallt reiknaðar saman. Því sé hætta á að hluti af þeim sem missa bótarétt sinn til atvinnuleysisbóta eftir 18 mánuði, eins og frumvarpið kveður á um að verði hámarkslengd tímabils atvinnuleysisbóta í stað 30 mánaða áður, eigi ekki rétt á fjárhagsaðstoð til framfærslu. Umtalsverður munur sé á upphæðum fjárhagsaðstoðar til framfærslu og heimildargreiðslna milli sveitarfélaga sem geri samanburð erfiðan.

Útlendingar og Íslendingar

Með minnisblaðinu fylgja síðan ýmsar tölulegar upplýsingar sem nefndin óskaði eftir meðal annars yfir fjölda fólks sem þegið hefur fjárhagsaðstoð frá borginni í febrúarmánuði árin 2023-2026.

Í febrúar 2026 fengu alls 1.173 einstaklingar fjárhagsaðstoð. Það eru færri en í sama mánuði árin 2023 og 2024 en örlítið fleiri en í febrúar 2025. Af þessum 1.173 voru 783 með erlent ríkisfang, eða 66,75 prósent rétt um 2/3. Af þessum hópi voru hins vegar 390 með íslenskt ríkisfang.

Af þessum 783 erlendu ríkisborgurum voru 574 atvinnulausir, 109 óvinnufærir og 100 voru flokkaðir undir „annað“ en í minnisblaðinu segir að þar geti verið um að ræða t.d. nema, ellilífeyrisþega eða fólk í hluta hlutastarf, fæðingarorlof.

Af íslenskum ríkisborgurunum voru 137 atvinnulausir, 235 óvinnufærir og 18 voru í „annað“ flokknum.

Meirihluti hinna erlendu ríkisborgara sem þáðu fjárhagsaðstoð voru í samræmdri móttöku flóttafólks eða 476 af þessum 783.