„Stefán Pálsson er líklega skarpasti kutinn í ræflinum sem eftir er af skúffu VG. Hæfilega skrítinn, mælskari en andskotinn, krullhærður – sem er plús – og sérlega fimur í að verja vondan málstað. Þetta kom allt vel fram í Silfrinu í kvöld. Hann er maður að mínu skapi,“ segir Össur en Stefán var gestur Silfursins í gærkvöldi ásamt Heimi Má Péturssyni, framkvæmdastjóri Flokks fólksins og Hildi Þórisdóttur, bæjarfulltrúi í Múlaþingi, þar sem þau fóru yfir stjórnmálaumræðu síðustu daga.
„VG þarf óvænta leiki til að lifa af og finna forystufólk með meiri kjörþokka en Svandís og Guðmundur Ingi sem bókstaflega slátruðu VG með ótrúlegum afleikjum á helspretti flokksins í blálok síðustu ríkisstjórnar. Bæði vilja þó leiða leifarnar í næstu kosningum,“ segir Össur sem telur að Stefán yrði óvænt útspil sem formannsefni og myndi „kjafta VG gegnum múrinn“ eins og hann orðar það.
Hvort þetta gerist skal ósagt látið og sjálfur virðist Össur ekki hafa mikla trú á því.
„En hann er ekki í flokkseigendaklíkunni, VG er á hraðri leið fyrir endanlegan ætternisstapa og fyrir löngu búið að tapa tengslum við raunveruleikann. Líklegast er að Svandís verði klöppuð upp til að veita tætlunum sem eftir eru af VG síðustu nábjargirnar. En enginn getur skammað mig fyrir að hafa ekki bent þeim á leið til lífs.“
Færsla Össurar vakti talsverða athygli og lögðu fyrrverandi þingmenn meðal annars orð í belg.
„Leiðin til að lifa fyrir þau er að hætta og gera upp undanfarin ár af ósérhlífni og heiðarleika – ef þau geta. Ég er ekki viss um að þau skilji skaðann sem þau bjuggu til og geti viðurkennt það,“ segir til dæmis Björn Leví Gunnarsson, fyrrverandi þingmaður Pírata.
Guðmundur Andri Thorsson, rithöfundur og fyrrverandi þingmaður Samfylkingar, telur hins vegar að VG eigi enn erindi í íslensk stjórnmál og ríkisstjórnin þurfi aðhald á þinginu frá vinstri, einkum í umhverfismálum.
„Stefán er manna skemmtilegastur en ég er ekki viss um að hið pólitíska argaþras dragi fram bestu hliðar hans.“
