„Aðfaranótt 8.október 2025 var áhöfn skipsins Conscience og átta annarra báta sem sigldu undir merkjum Frelsisflotans (e.Freedom Flotilla) áleiðis til Gaza rænt af Ísrael á alþjóðlegu hafsvæði. Þeirra á meðal er móðir okkar, systir og dóttir, Margrét Kristín Blöndal, betur þekkt sem Magga Stína,“ segir í tilkynningu frá Elsu Maríu Blöndal, Salvör Gullbrá Þórarinsdóttur og Sólveigu Hauksdóttur, dóttur, systur og móður Möggu Stínu.
„Þeim er nú siglt áleiðis til Ashdod hafnar, en við höfum misst allt samband við Möggu Stínu og aðra skipverja,“ segir enn fremur í tilkynningunni.
„Við fjölskyldan biðlum til íslenskra stjórnvalda að beita sér með öllum mætti fyrir því að ísraelsk yfirvöld leysi hana úr haldi tafarlaust, sem og aðra í áhöfn Frelsisflotans.“
Í tilkynningunni kemur fram að um borð í The Conscience, skipinu sem Magga Stína sigldi með, voru hátt í hundrað heilbrigðisstarfsmenn, blaðamenn og friðarsinnar í fullkomlega lögmætum erindagjörðum: að koma neyðaraðstoð og heilbrigðisstarfsfólki til þjáðra og sveltandi íbúa Gaza.
„Um borð voru lífsnauðsynjar á borð við lyf, hjúkrunarvörur og mataraðstoð upp á 13 milljónir króna, hjálpargögn sem er kerfisbundið haldið frá Gazasvæðinu af ísraelskum stjórnvöldum.“
Þá kemur fram að Ísrael standi engin ógn af þeim skipum sem sigla undir merkjum Frelsisflotans.
„Engu að síður hafa ísraelsk stjórnvöld gert skipin sem á undan sigldu upptæk með ofbeldi og ógnunum, rænt skipverjum og fargað matvælum og lyfjum sem um borð voru. Fréttir bárust í kjölfarið af illri meðferð Ísraels á fólkinu sem haldið er í Ktzi’ot-fangelsinu. Þeim hefur verið misþyrmt, neitað um næringu, vatn, svefn og lífsnauðsynleg lyf tekin af þeim. Mannréttindi þeirra eru virt að vettugi, rétt eins og Ísrael hefur virt mannréttindi palestínsku þjóðarinnar að vettugi allt frá byrjun hernáms og þjóðarmorðs Ísraels í Palestínu.
Áhyggjur okkar fjölskyldu Möggu Stínu og vina hennar eru eðlilega miklar af framvindu mála. Einkum þegar hugað er að þeirri meðferð sem hún kemur að öllum líkindum til með að verða fyrir af hendi Ísraelshers.“
Skora aðstandendur Möggu Stínu á á íslensku ríkisstjórnina og almenning að fordæma handtöku Ísraela á almennum borgurum og krefjast þess að allir sjálfboðaliðar verði látnir lausir tafarlaust.
