Kristrún Frostadóttir forsætisráðherra og Daði Már Kristófersson fjármálaráðherra taka ekki undir með Ingu Sæland, formanni Flokks fólksins og félagsmálaráðherra, að hækka þurfi lægstu laun verði örorkubætur hærri en lægstu laun.

Þetta segja Kristrún og Daði í samtali við Morgunblaðið í dag.

Eins og kunnugt er kynnti Inga Sæland nýtt örorku- og endurhæfingarkerfi síðastliðinn mánudag. Nýja kerfið er einfaldara, greiðslur hækka auk þess sem dregið er úr tekjutengingum og fólki gert auðveldara að vera á vinnumarkaði kjósi það svo. Um 95% þeirra sem hafa verið með örorkulífeyri fá hærri greiðslur í nýja kerfinu.

Bent var á það í Morgunblaðinu í gær að þær áhyggjur hafi verið viðraðar að frumvarpið feli í sér að sumir fái hærri tekjur á örorku en þeir höfðu á vinnumarkaði. Að sama skapi myndi það þýða tekjutap ef þeir snúa aftur á vinnumarkað.

„Ef staðan er orðin sú að örorkubætur verða hærri en til dæmis lægstu laun, þá liggur það einfaldlega fyrir að það þarf að hækka lægstu launin,“ sagði Inga á forsíðu Morgunblaðsins í gær.

Í Morgunblaðinu í dag er rætt við þau Kristrúnu og Daða og deila þau ekki þessari sýn Ingu.

Kristrún bendir á að ríkisstjórnin semji ekki um kaup og kjör á vinnumarkaði nema hvað opinbera starfsmenn varðar. Spurð hvort orð hennar séu ávísun á ókyrrð á vinnumarkaði segir Kristrún:

„Eins og ég segi, þá eru lágmarkslaun í landinu, það er samið um þau, en við stöndum ekki í slíkum samningum nú og ríkið er ekki að stíga með neinum hætti inn í kjarasamninga.“

Daði Már tekur í svipaðan streng og segir það ekki vera ákvörðun ríkisstjórnarinnar að ákvarða lægstu laun. Þegar Daða var bent á að Inga hefði einnig nefnt að lækka þyrfti verð á nauðsynjavöru sagði hann ekkert slíkt í bígerð. „Það er ekkert slíkt til skoðunar. Við þurfum að viðhalda aðhaldsstigi ríkisfjármála,“ segir hann við Morgunblaðið í dag.