Donald Trump Bandaríkjaforseti er á barmi þess að missa alla stjórn á sínum öfgafullustu stuðningsmönnum sem margir hverjir eru brjálaðir yfir þeirri ákvörðun yfirvalda að ætla að birta hin svokölluðu Epstein-skjöl eins og áður hafði verið lofað, meðal annars af Trump sjálfum. Sögðu yfirvöld í umdeildu minnisblaði að ekkert benti til þess að Epstein hefði haldið skrá yfir viðskiptavini sína og þá var fullyrt að Epstein hefði sjálfur tekið eigið líf en ekki verið myrtur af valdamiklu fólki eins og margir eru sannfærðir um.
Sá Trump sig knúinn til þess að fordæma „fyrrverandi stuðningsmenn“ sína harðlega fyrir að gefa málinu of mikinn gaum í færslum á Truth Social, samfélagsmiðli sínum. Fór forsetinn mikinn en alls birti hann þrettán færslur þar sem hann lét allskonar aðila heyra það vegna málsins. Sakaði hann meðal annars falsfréttaskrifandi fjölmiðla um knýja málið áfram, Demókrata um að hafa búið til „Epstein-blekkinguna“ og „heimska repúblikana“ um að sjá um skítavinnuna fyrir demókrata og dreifa hinni meintu blekkingu.
Skilaboð forsetans voru enn á ný þau að það væri einfaldlega ekkert bitastætt í gögnum málsins og gagnrýnendur ættu að snúa sér að öðru.
Fyrir stuttu síðan hefði Trump getað treyst á bandamann sinn, auðkýfinginn Elon Musk, að dreifa hinni nýju samsæriskenningu sinni og hjóla í demókrata. En nú er öldin önnur.
Eins og alþjóð veit urðu söguleg vinslit milli valdamannanna á dögunum. Musk brást við færslu Trump með því að hæðast duglega að forsetanum.
„Vá, ótrúlegt að Epstein hafi „drepið sig“ og Gishlaine dúsi í alríkisfangelsi út af blekkingu,“ skrifaði Musk í færslu á X. og bætti við í annarri færslu: „Hann ætti að opinbera gögnin og benda á hvað það er í þeim sem er blekking.“
Eins og frægt varð lýsti Musk því yfir í mjög svo opinberu samfélagsmiðlarifrildi tvímenninganna valdamiklu að Trump væri sjálfur í Epstein-gögnum.
Ljóst er að málinu er hvergi nærri lokið enda ljóst að Trump hefur valdið mörgum harðkjarna stuðningsmönnum sínum verulegum vonbrigðum.
