Greint er frá þessu á Facebook-síðu Lögreglunnar á Norðurlandi eystra þar sem fram kemur að húsleitirnar hafi verið framkvæmdar að undangengnum úrskurðum frá Héraðsdómi Norðurlands eystra.
„Lögreglan á Norðurlandi eystra hefur um nokkurt skeið unnið að rannsókn á skipulagðri brotastarfsemi sem talin er tengjast fíkniefnaframleiðslu,“ segir í tilkynningunni.
Þar segir enn fremur að með aðgerðunum í gær hafi verið unnt að staðfesta þessar grunsemdir og er rannsókn á frumstigi. Farið verður fram á gæsluvarðhald yfir sakborningum í dag.
„Í aðgerðunum var lögreglan á Norðurlandi eystra í samstarfi við lögregluna á Vesturlandi, lögregluna á höfuðborgarsvæðinu og sérsveit Ríkislögreglustjóra. Málið er enn á viðkvæmu stigi og ekki er unnt að veita frekari upplýsingar að svo stöddu.“
