Lögreglan á höfuðborgarsvæðinu mun fara fram á gæsluvarðhald yfir franskri konu sem er grunuð um að hafa stungið eiginmann sinn og dóttur til bana á Edition hótelinu.
Ævar Pálmi Pálmason aðstoðaryfirlögregluþjónn segir að mynd sé komin á rannsóknina en hún sé á frumstigi. Mikil vettvangsrannsókn sem þurfi að fara fram. Hún muni taka einhverja daga.
„Hin slasaða nýtur réttarstöðu sakbornings og það verður farið fram á gæsluvarðhald núna seinnipartinn,“ segir Ævar Pálmi.
Hann segir að tilkynningin um atvikið hafi komið frá hótelinu. Hvort fleiri séu í hópnum sé eitthvað sem verið sé að rannsaka. Þá eigi einnig eftir að hafa samband við aðstandendur.
„Það eru áverkar á þeim öllum, þar á meðal stunguáverkar. En það mun þurfa frekari réttarmeinafræðilega rannsókn,“ segir hann.
Ævar Pálmi staðfestir að um sé að ræða franska ferðamenn. Hann vill ekki staðfesta fjölskyldubönd að svo stöddu.
Heimildir herma að móðir á sextugsaldri hafi stungið eiginmann sinn, og dóttur á fertugsaldri.
Ekki er vitað hvenær atvikið átti sér stað. Það er hvort að það hafi skeð í morgun eða fyrr. Það er verkefni rannsóknarinnar að komast að því.
