Sigurður Fannar Þórsson, sem ákærður er fyrir að hafa ráðið tíu ára dóttur sinni bana játaði sök við aðalmeðferð málsins í héraðsdómi Reykjaness í dag.

Þinghald í málinu var lokað vegna náinna fjölskyldutengsla. Dómur í málinu verður kveðinn upp eftir rúmar þrjár vikur, 4. júlí.

RÚV greinir frá að Sigurður Fannar játaði sök en bar þó fyrir sig minnisleysi að einhverju leyti. Hann samþykkti jafnframt bótakröfu móður stúlkunnar,  fimm milljónir króna í miskabætur og eina og hálfa milljón í útfararkostnað. 

Sigurður hringdi sjálfur í Neyðarlínuna frá Krýsuvík að kvöldi 15. september og tilkynnti um andlát dóttur sinnar, Kolfinnu Eldeyjar. Lögregla fann hann nærri að Hraunhólum við Krýsuvíkurveg og beindi hann lögreglu að staðnum þar sem dóttir hans fannst. Endurlífgunartilraunir hófust strax á vettvangi, en báru ekki árangur.

Sigurður Fannar hefur setið í gæsluvarðhaldi frá 15. september. Hann var metinn sakhæfur af geðlæknum. 

Í ákæru var Sigurður Fannar ákærður fyrir manndráp og stórfellt brot í nánu sambandi með því að hafa sunnudaginn 15. september 2024, að Hraunhólum við Krýsuvíkurveg, skammt vestan við Vatnsskarðsnámur, veist að dóttur sinni og banað henni.

Ingibjörg Dagný Ingadóttir, móðir Kolfinnu Eldeyjar, sagði í færslu sinni 15. janúar að samfélagið þurfi að vakna. Barnsfaðir hennar, sem nú er ákærður fyrir að hafa banað dóttur þeirra, hafi ekki fengið þá hjálp sem hann þurfti því kerfið er brotið og stjórnvöld leyfðu því að gerast.

Sjá einnig: Móðir Kolfinnu Eldeyjar: „Ég segi mína sögu því að samfélagið þarf að vakna“