Matvælastofnun hefur tilkynnt að salmonella hafi greinst á kúabúi í Eyjafirði.

Um er að ræða bæinn Fellshlíð en í tilkynningunni kemur fram að salmonella greindist í sýnum sem tekin voru í síðustu viku á búinu. Ástæða sýnatökunnar hafi verið sú að einstaklingur sem tengist búinu hafi greinst með salmonellusýkingu og á búinu hafi einnig verið naugripir með sjúkdómseinkenni, m.a. blóðuga skitu.

Segist stofnunin hafa gefið fyrirmæli um ýmsar ráðstafanir til að hindra smitdreifingu frá búinu. Þær feli m.a. í sér að bannað sé að flytja lifandi dýr út af búinu án leyfis héraðsdýralæknis, þjónustuaðilar skuli klæðast einnota hlífðarfatnaði eða fatnaði búsins, fóðurbíll og mjólkurbíll skuli fara á búið í lok dags, nautgripir skuli aðeins sendir til slátrunar að undangenginni sýnatöku og neikvæðri niðurstöðu rannsóknar, búfjáráburð megi aðeins nota að uppfylltum ákveðnum skilyrðum og hræjum skuli fargað með öruggum hætti.

Óhætt að drekka

Sérstaklega er tekið fram í tilkynningunni að engin hætta stafi af neyslu mjólkur frá búinu eftir gerilsneyðingu.

Matvælastofnun segir að ekki sé vitað hvernig smitið hafi borist inn á búið en unnið sé að öflun upplýsinga. Í undirbúningi séu nánari sýnatökur og rannsóknir til að kortleggja umfang smitsins og mögulegar smitleiðir.

Bændur í nágrenni búsins eru í tilkynningunni beðnir um að hafa strax samband við dýralækni eða Matvælastofnun ef þeir verða varir við sjúkdómseinkenni í nautgripum sem geti bent til salmonellusýkingar. Algengustu einkenni séu minni átlyst, fall í nyt, hiti og niðurgangur sem oft sé illa lyktandi og blóðugur.

Sjaldgæft

Loks segir í tilkynningu Matvælastofnunar að bændum á búinu verði leiðbeint um þrif og sótthreinsun. Búið verði síðan undir eftirliti stofnunarinnar og sýni verði tekin reglubundið næstu mánuði eða þar til öruggt geti talist að smitið hafi verið upprætt.

Stofnunin tekur sérstaklega fram að Salmonella hafi mjög sjaldan greinst í nautgripum hér á landi. Það sé til mikils að vinna að koma í veg fyrir salmonellusýkingar því mjög vandasamt og tímafrekt geti verið að útrýma smitinu