Heimili leikarans Gene Hackman og eiginkonu hans Betsy Arakawa var sannkallað rottugreni. Betsy lést úr veiru sem berst gjarnan með nagdýrum.

Hjónin fundust látin á heimilinu þann 26. febrúar síðastliðinn ásamt einum af heimilishundunum. Þótti málið hið dularfyllsta en seinna kom í ljós að Betsy, sem var um 30 árum yngri en Gene, lést úr svokölluðum hantavírus, sem berst aðallega með nagdýrum. Gene, sem var með Alzheimer, lést um viku seinna úr hjartasjúkdómi.

Hackman hjónin bjuggu í 500 milljón króna villu, en henni var hins vegar illa við haldið. Lét heilbrigðiseftirlit New Mexico fylkis gera úttekt á húsinu, um viku eftir að hjónin fundust látin.

Niðurstöðurnar liggja nú fyrir og kemur í ljós að húsið var gróðrarstía fyrir hantavírus. Það er rottu og músagangur var gríðarlegur í húsinu.

Sjá einnig:

Gene Hackman og eiginkona hans fundust látin

Hantavírus smitast einkum með þvagi og skít úr nagdýrum. Nagdýraskítur fannst víða á heimilinu, í bílskúrum og kofum. Þá fundust einnig nagdýrahreiður með lifandi dýrum í bílskúrum. Einnig fundust nagdýr í bílum Hackman hjónanna og nagdýragildrur inni í húsinu, sem gefur til kynna að þau hafi vitað af vandamálinu og verið að reyna að bregðast við því.

Hantavírus er afar sjaldgæfur í Bandaríkjunum. Aðeins um 50 tilfelli greinast á ári. Hann er hins vegar ákaflega skæður.