Sólveig Anna Jónsdóttir formaður Eflingar segir á Facebook-síðu sinni frá fundi um mygluvandamál í ónefndum leikskóla í Reykjavíkurborg. Sólveig Anna segir einn af trúnaðarmönnum félagsins hafa verið viðstaddan fundinn og segi frá því að fulltrúar borgarinnar á fundinum hafi virst vera illa undirbúnir og þar að auki sýnt foreldrum af erlendum uppruna, sem voru á fundinum, virðingarleysi.

Sólveig Anna segir fundinn hafa verið haldinn í gær. Á honum hafi verið stjórnendur, foreldrar, starfsfólk og í það minnsta tveir fulltrúar frá Reykjavíkurborg. Fólk hafi spurt ýmissa spurninga og almennt hafi upplifunin verið sú að fulltrúar borgarinnar væru ekki nægilega vel undirbúnir.

Þegar kom að því að fundargestir sem lítil tök hafa á íslensku fóru að spyrja á spurninga á ensku hafi fulltrúar borgarinnar brugðist illa við:

„Sá fulltrúi borgarinnar sem sat fyrir svörum tilkynnti þá að fundurinn færi eingöngu fram á íslensku. Þegar að fundargestir sögðust vera tilbúnir til að túlka var því hafnað af fulltrúa borgarinnar. Að þessum samskiptum loknum hunsaði hann allar spurningar sem að settar voru fram á ensku.“

Virðing

Trúnaðarmaður Eflingar á leikskólanum lýsti atburðunum á fundinum fyrir Sólveigu Önnu sem segir að trúnaðarmanninum og samstarfsfólki hans sé verulega brugðið vegna þessarar framkomu fulltrúa borgarinnar. Sólveig Anna tekur heilshugar undir með þeim og segir framkomuna til skammar:

„Ég tek undir með þeim. Framkoma umrædds einstaklings sem starfar hjá borginni er til háborinnar skammar. Leikskólar hér í borg eru fjölþjóðlegir. Þar starfar fólk með fjölbreyttan uppruna og þar dvelja börn allsstaðar að úr heiminum. Það er einfaldlega skylda starfsmanna að viðurkenna þessa staðreynd og vinna með fólki, hvort sem það talar íslensku eða ekki. Virðing og vinskapur gagnvart öllu starfsfólki og öllum foreldrum verður að vera til staðar. Annað gengur ekki.“

Sólveig Anna segir að trúnaðarmaðurinn hafi gert athugasemdir við þetta framferði á fundinum og hún sé stolt af því. Að lokum segist hún vona að rætt verði af alvöru við umræddan aðila og útskýrt fyrir honum að hann sé að vinna fyrir alla íbúa borgarinnar sama hvaða tungumál þeir tali.